തിരുവനന്തപുരം അന്താരാഷ്ട്ര ചലച്ചിത്രമേളയിൽ (ഐഎഫ്എഫ്കെ) പ്രദർശിപ്പിക്കാനിരുന്ന ചില സിനിമകൾ ഒഴിവാക്കാൻ കേന്ദ്രസർക്കാർ നിർദ്ദേശം നൽകിയതായി റിപ്പോർട്ട്. നിലവിൽ 19 സിനിമകളാണ് മേളയിൽ നിന്ന് ഒഴിവാക്കിയിരിക്കുന്നത്. സിനിമകൾ ഒഴിവാക്കാനുള്ള കാരണങ്ങൾ ഇതുവരെ ഔദ്യോഗികമായി അറിയിച്ചിട്ടില്ലെന്ന് കേരള സംസ്ഥാന ചലച്ചിത്ര അക്കാദമി വ്യക്തമാക്കി.
മേളയുടെ ഉദ്ഘാടന ചിത്രമായ പലസ്തീൻ 36, റഷ്യൻ വിപ്ലവത്തെ പശ്ചാത്തലമാക്കിയ ക്ലാസിക് ചിത്രം ബാറ്റിൽഷിപ്പ് പൊട്ടൻകിൻ, സ്പാനിഷ് സിനിമയായ ബീഫ് എന്നിവ ഉൾപ്പെടെ 19 ചിത്രങ്ങൾക്കാണ് ഇതുവരെ കേന്ദ്രാനുമതി ലഭിക്കാത്തത്. ഇതോടെ മേളയുടെ പരിപാടി പട്ടികയിൽ മാറ്റങ്ങൾ വരുത്തേണ്ട സാഹചര്യം സൃഷ്ടിച്ചിട്ടുണ്ട്.
കേന്ദ്രത്തിന്റെ ഇടപെടലിനെതിരെ കടുത്ത വിമർശനമാണ് ഉയരുന്നത്. ഇത് ഭയപ്പെടുത്തുന്നതും അഭിപ്രായസ്വാതന്ത്ര്യത്തിനെതിരായതുമായ നടപടിയാണെന്ന് സിപിഎം ജനറൽ സെക്രട്ടറി എം.എ. ബേബി പ്രതികരിച്ചു. കലയും സാംസ്കാരികവും സ്വതന്ത്രമായിരിക്കേണ്ട മേഖലയിലേക്കുള്ള കേന്ദ്രത്തിന്റെ ഇടപെടൽ അംഗീകരിക്കാനാകില്ലെന്നും അദ്ദേഹം പറഞ്ഞു.
അതേസമയം, സിനിമകൾ ഒഴിവാക്കിയതിനെതിരെ ഐഎഫ്എഫ്കെ വേദിയിൽ പ്രതിഷേധം ഉയർന്നിട്ടുണ്ട്. മേളയുടെ സ്വതന്ത്ര സ്വഭാവം സംരക്ഷിക്കണമെന്നും, സിനിമകളെ വിലക്കാനുള്ള നടപടികൾ പുനഃപരിശോധിക്കണമെന്നും ചലച്ചിത്രപ്രേമികളും പ്രവർത്തകരും ആവശ്യപ്പെട്ടു.
അറബി ഡോക്യുമെന്ററിയായ എ പോയറ്റ്: അണ്കണ്സീല്ഡ് പോയട്രി, ചെറിയന് ഡാബിസിന്റെ ആള് ദാറ്റ്സ് ലെഫ്റ്റ് ഓഫ് യൂ, ബമാകോ അബ്ദറഹ്മാന് സിസാക്കോ, ബാറ്റില്ഷിപ്പ് പൊട്ടെംകിന് സെര്ജി ഐസന്സ്റ്റീന്, ബീഫ് ലീ സുങ് ജിന്, ക്ലാഷ് മുഹമ്മദ് ഡയബ്, ഈഗിള്സ് ഓഫ് ദി റിപ്പബ്ലിക് താരിക് സാലിഹ്, ഹാര്ട്ട് ഓഫ് ദി വുള്ഫ് , വണ്സ് അപ്പോണ് എ ടൈം ഇന് ഗാസ, പാലസ്തീന് 36 -ആനിമേരി ജാസിര്, റെഡ് റെയിന്, റിവര്സ്റ്റോണ്, ദി അവര് ഓഫ് ദി ഫര്ണസസ് -ഫെര്ണാണ്ടോ സോളനാസ് & ഒക്ടാവിയോ ഗെറ്റിനോ, ടണല്സ്: സണ് ഇന് ദി ഡാര്ക്ക്-ബുയി താക് ചുയെന്, യെസ് സാലി പോട്ടര്, ഫ്ലെയിംസ് -സോയ അക്തര്, ടിംബക്റ്റു -അബ്ദറഹ്മാന് സിസാക്കോ, വാജിബ് -ആനിമേരി ജാസിര് മുതലായ ചിത്രങ്ങളാണ് ഒഴിവാക്കാന് കേന്ദ്രസര്ക്കാര് നിര്ദേശിച്ചിരിക്കുന്നത്.
