ദേശീയപാത ഉപരോധവുമായി ബന്ധപ്പെട്ട കേസിൽ ഷാഫി പറമ്പിൽ എംപിക്കെതിരെ കോടതി അറസ്റ്റ് വാറന്റ് പുറപ്പെടുവിച്ചു. പാലക്കാട് ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയാണ് അറസ്റ്റ് ചെയ്ത് ഹാജരാക്കാൻ പോലീസിന് നിർദേശം നൽകിയത്.
2022-ൽ നടന്ന ഒരു പ്രതിഷേധത്തിന്റെ ഭാഗമായാണ് കേസ് രജിസ്റ്റർ ചെയ്തത്. അന്ന് എംഎൽഎയായിരുന്ന ഷാഫി പറമ്പിലിന്റെ നേതൃത്വത്തിലായിരുന്നു ദേശീയപാത ഉപരോധം. കേസിൽ നേരിട്ട് ഹാജരാകാൻ നിരവധി അവസരങ്ങൾ നൽകിയിട്ടും എംപി ഹാജരായില്ലെന്ന് കോടതി നിരീക്ഷിച്ചു.
ഇതോടെയാണ് കോടതി കർശന നടപടിയിലേക്ക് നീങ്ങിയത്. കേസ് ഈ മാസം 24-ന് വീണ്ടും പരിഗണിക്കും. നിലവിൽ വടകര എംപിയായ ഷാഫി പറമ്പിലിനെതിരെയുള്ള അറസ്റ്റ് വാറന്റ് രാഷ്ട്രീയ വൃത്തങ്ങളിൽ വലിയ ചർച്ചയായിട്ടുണ്ട്.
