കൊച്ചിയിൽ നിന്ന് ആലിൻ ഷെറിൻ എബ്രഹാമിന്റെ അവയവങ്ങളുമായി പുറപ്പെട്ട ആംബുലൻസ് തടസങ്ങളില്ലാതെ തിരുവനന്തപുരത്തെത്തി ദൗത്യം വിജയകരമായി പൂർത്തിയാക്കി. അവയവങ്ങൾ സുരക്ഷിതമായി KIMSHEALTH, SAT Hospital (മെഡിക്കൽ കോളജ് എസ്എടി) എന്നിവിടങ്ങളിലും കൈമാറി.
തിരുവനന്തപുരം സ്വദേശിയായ ആറുമാസം പ്രായമുള്ള കുഞ്ഞിന് വേണ്ടിയുള്ള കരൾ മാറ്റിവയ്ക്കൽ ശസ്ത്രക്രിയ കിംസിൽ ആരംഭിച്ചു. ഡോ. ഷബീർ അലി, ഡോ. ഷിറാസ് എന്നിവരുടെ നേതൃത്വത്തിലാണ് ശസ്ത്രക്രിയ പുരോഗമിക്കുന്നത്. കരൾ സ്വീകരിക്കുന്ന ഏറ്റവും പ്രായം കുറഞ്ഞ കുഞ്ഞെന്ന പ്രത്യേകതയും ഈ ശസ്ത്രക്രിയയ്ക്കുണ്ട്. മണിക്കൂറുകൾ നീളുന്ന സങ്കീർണ ശസ്ത്രക്രിയയായിരിക്കും ഇത്.
എസ്എടി ആശുപത്രിയിൽ ചികിത്സയിലുള്ള മറ്റൊരു കുട്ടിക്ക് ആലിന്റെ രണ്ട് വൃക്കകളും നൽകും. സാധാരണയായി രണ്ട് വൃക്കകൾ രണ്ടുപേർക്ക് നൽകുന്ന രീതിയാണുള്ളത്. എന്നാൽ പത്തുമാസം മാത്രം പ്രായമുള്ള കുഞ്ഞിന്റെ വൃക്കകൾക്ക് വലിപ്പം കുറവായതിനാൽ രണ്ട് വൃക്കകളും ഒരേ കുട്ടിക്കാണ് നൽകുന്നത്. ‘എൻ ബ്ലോക്ക് ട്രാൻസ്പ്ലാന്റേഷൻ’ എന്നറിയപ്പെടുന്ന ഈ രീതി ഇത്തരമൊരു സാഹചര്യത്തിൽ ആദ്യമായാണ് നടപ്പിലാക്കുന്നത്. തുടർന്ന് ഹൃദയ വാൽവുകൾ ശ്രീചിത്രയിലേക്കും, നേത്രപടലങ്ങൾ കൊച്ചിയിലെ Amrita Hospitalയിലെ രോഗികൾക്കും നൽകി.
കൊച്ചിയിൽ നിന്ന് ആരംഭിച്ച ആംബുലൻസിന്റെ യാത്രയ്ക്ക് പൊതുജനങ്ങളും പൊലീസും വലിയ പിന്തുണ നൽകി. ശിവരാത്രി ഉത്സവത്തിരക്കിനിടയിലും കിളിമാനൂർ, വെഞ്ഞാറമൂട്, കഴക്കൂട്ടം മേഖലകളിൽ വഴിയൊരുക്കാൻ എല്ലാവരും കൈകോർത്തു. ക്ഷേത്ര ഭാരവാഹികളും വോളന്റിയർമാരും മുൻകൈ എടുത്ത് റോഡ് പൂർണമായും ക്ലിയർ ചെയ്തു. കഴക്കൂട്ടത്ത് വൈകുന്നേരത്തെ തിരക്ക് നിയന്ത്രിക്കാൻ പൊലീസും ശക്തമായ നടപടികൾ സ്വീകരിച്ചു. ടെക്നോപാർക്കിൽ നിന്നുള്ള വാഹനത്തിരക്ക് നിയന്ത്രിച്ചാണ് ആംബുലൻസിന് ഗ്രീൻ ചാനൽ ഒരുക്കിയത്.
വൈകുന്നേരം 6.30ഓടെ എറണാകുളം അമൃത ആശുപത്രിയിൽ നിന്ന് പുറപ്പെട്ട ആംബുലൻസ്, ദേശീയപാത നിർമാണം നടക്കുന്ന വൈറ്റിലയിൽ ചെറിയ താമസമുണ്ടായെങ്കിലും തടസങ്ങളില്ലാതെ യാത്ര തുടർന്നു. ഏകദേശം 225 കിലോമീറ്റർ ദൂരമായ എറണാകുളം–തിരുവനന്തപുരം യാത്ര സാധാരണയായി ആറു മണിക്കൂർ എടുക്കുന്നുവെങ്കിലും, ഗ്രീൻ ചാനൽ സംവിധാനത്തിലൂടെ മൂന്നു മണിക്കൂറിനുള്ളിൽ പിന്നിട്ടു.
റോഡ് മാർഗം അവയവങ്ങൾ എത്തിക്കുന്നതിനാൽ എല്ലാ ജില്ലകളിലും ഗതാഗത ക്രമീകരണങ്ങൾ ഏർപ്പെടുത്താൻ ബന്ധപ്പെട്ട അധികൃതർ പൊലീസിനോട് അഭ്യർഥിച്ചിരുന്നു. സമൂഹത്തിന്റെ കൂട്ടായ്മയും സമയബന്ധിത ഇടപെടലും കൊണ്ടാണ് ഈ ജീവൻ രക്ഷാ ദൗത്യം വിജയകരമായി പൂർത്തിയായത്.
