മുനമ്പം ഭൂസംരക്ഷണ സമിതിയുടെ സമരം ഇന്ന് അവസാനിക്കുന്നതാണ്. ഉച്ചയ്ക്ക് രണ്ടരയോടെ മന്ത്രിമാരായ പി. രാജീവും കെ. രാജനും സമരപ്പന്തലിലെത്തി സമരക്കാരെ നാരങ്ങാനീര് നൽകി സമരം ഔദ്യോഗികമായി അവസാനിപ്പിക്കും. കഴിഞ്ഞ ദിവസം ഹൈക്കോടതി പുറപ്പെടുവിച്ച ഉത്തരവ് ഭൂമി പോക്കുവരവിന് കുടുംബങ്ങൾക്ക് കരമടയ്ക്കാനുള്ള വഴിയൊരുക്കിയതോടെ, സമരം അവസാനിപ്പിക്കാൻ ഭൂരിപക്ഷം പേരും തയ്യാറായി.
ഇനി ജുഡീഷ്യൽ കമ്മീഷൻ വഴിയുള്ള പ്രശ്നപരിഹാരത്തിനും വഖഫ് ട്രൈബ്യൂണലിന്റെ അന്തിമ വിധിക്കും മുനമ്പം നിവാസികൾ കാത്തിരിക്കുകയാണ്. വഖഫ് ബോർഡ് അവകാശവാദം ഉന്നയിച്ച ഭൂമിയിൽ താമസിക്കുന്നവർക്ക് നിശ്ചിത വ്യവസ്ഥകളോടെ ഭൂനികുതി അടയ്ക്കാമെന്ന് ഹൈക്കോടതി ഉത്തരവിട്ടിരുന്നു. മുനമ്പം നിവാസികളെ കുടിയിറക്കില്ലെന്ന മുഖ്യമന്ത്രിയുടെ ഉറപ്പ് പാലിക്കപ്പെട്ടിരിക്കുകയാണെന്ന് കഴിഞ്ഞ ദിവസം മന്ത്രി പി. രാജീവ് വ്യക്തമാക്കിയിരുന്നു.
