കേരളത്തിന്റെ കടമെടുപ്പ് പരിധി കേന്ദ്ര സര്ക്കാര് വീണ്ടും കുറച്ചു. ജനുവരി, ഫെബ്രുവരി, മാര്ച്ച് മാസങ്ങളിലേക്കുള്ള 5,944 കോടി രൂപയാണ് വെട്ടിക്കുറച്ചത്. ഇതോടെ 12,516 കോടി രൂപയില് നിന്ന് കേരളത്തിന് ഇനി ലഭിക്കുക 6,572 കോടി രൂപ മാത്രമായിരിക്കും. ഇതുമായി ബന്ധപ്പെട്ട കത്ത് സംസ്ഥാന ധനവകുപ്പിന് ലഭിച്ചിട്ടുണ്ട്.
കിഫ്ബിയും പെന്ഷന് കമ്പനിയും അധികമായി വായ്പ എടുത്തുവെന്നാണ് കേന്ദ്രത്തിന്റെ വിശദീകരണം. തിരഞ്ഞെടുപ്പ് വര്ഷത്തില് വന് പണച്ചെലവ് ലക്ഷ്യമിട്ടിരുന്ന സംസ്ഥാന സര്ക്കാരിന് ഈ തീരുമാനം വലിയ പ്രതിസന്ധിയുണ്ടാക്കും.
ഇടക്കാല ബജറ്റ് അവതരണവും തെരഞ്ഞെടുപ്പും അടുത്തിരിക്കെയാണ് നടപടി. കേരളത്തിന്റെ കടമെടുപ്പ് പരിധിയില് കൊണ്ടുവന്ന നിയന്ത്രണങ്ങള് ലഘൂകരിക്കണമെന്നും സാമ്പത്തിക പരിധിയില് വരുത്തിയ വെട്ടിക്കുറവ് ഒഴിവാക്കണമെന്നും ആവശ്യപ്പെട്ട് മുഖ്യമന്ത്രി അടുത്തിടെ നടത്തിയ കൂടിക്കാഴ്ചയില് പ്രധാനമന്ത്രിയോട് അഭ്യര്ഥിച്ചിരുന്നു.
