ബഹ്റൈനെതിരെ നടന്നുകൊണ്ടിരിക്കുന്ന ഇറാന്റെ മിസൈൽ ആക്രമണങ്ങളുടെ പശ്ചാത്തലത്തിൽ ബഹ്റൈനിലെ യുഎസ് എംബസി നാളെ (ഞായർ, മാർച്ച് 1, 2026) അടച്ചിടുമെന്ന് പ്രഖ്യാപിച്ചു. അതേസമയം, അമേരിക്കൻ സ്റ്റേറ്റ്സ് ഡിപ്പാർട്ട്മെന്റിൽ കുവൈത്തിലെ എംബസി ജീവനക്കാരോട് സുരക്ഷിത സ്ഥലങ്ങളിൽ അഭയം തേടാൻ നിർദേശം നൽകിയതായും റിപ്പോർട്ടുണ്ട്.
ബഹ്റൈന്റെ തലസ്ഥാനമായ മനാമയിലെ യുഎസ് എംബസി ശനിയാഴ്ച ‘എക്സ്’ പ്ലാറ്റ്ഫോമിൽ പ്രസ്താവന പുറത്തിറക്കി. ഫെബ്രുവരി 28ന് ബഹ്റൈനിൽ നടന്നുകൊണ്ടിരിക്കുന്ന മിസൈൽ ആക്രമണങ്ങളെ തുടർന്ന് മാർച്ച് 1 ഞായറാഴ്ച എംബസി അടച്ചിടുമെന്ന് അറിയിപ്പിൽ പറയുന്നു. ഞായറാഴ്ച നിശ്ചയിച്ചിരുന്ന എല്ലാ പതിവ്, അടിയന്തര കോൺസുലർ അപ്പോയിന്റ്മെന്റുകളും റദ്ദാക്കിയതായി എംബസി അറിയിച്ചു. എംബസി എപ്പോൾ സാധാരണ പ്രവർത്തനങ്ങളിലേക്ക് മടങ്ങുമെന്നത് പിന്നീട് അറിയിക്കുമെന്നും പ്രസ്താവനയിൽ കൂട്ടിച്ചേർത്തു.
ബഹ്റൈനിലുള്ള അമേരിക്കൻ പൗരന്മാർ സ്വീകരിക്കേണ്ട മുൻകരുതൽ നടപടികൾ സംബന്ധിച്ച നിർദേശങ്ങളും അറിയിപ്പിൽ ഉൾപ്പെടുത്തിയിട്ടുണ്ട്. ഏറ്റവും പുതിയ സുരക്ഷാ മുന്നറിയിപ്പുകൾക്കായി എംബസിയുടെ ഔദ്യോഗിക വെബ്സൈറ്റ് നിരന്തരം പരിശോധിക്കണമെന്നും Smart Traveler Enrollment Program (STEP)യിൽ രജിസ്റ്റർ ചെയ്യണമെന്നും നിർദേശിച്ചു. ഈ പദ്ധതിയിൽ രജിസ്റ്റർ ചെയ്താൽ സുരക്ഷാ അപ്ഡേറ്റുകൾ നേരിട്ട് ലഭിക്കുമെന്നും അടിയന്തര സാഹചര്യങ്ങളിൽ എംബസിക്ക് പൗരന്മാരുമായി വേഗത്തിൽ ആശയവിനിമയം നടത്താൻ സാധിക്കുമെന്നും എംബസി വ്യക്തമാക്കി.
