പിതാവിന്റെ അപ്രതീക്ഷിത വിയോഗം സൃഷ്ടിച്ച വലിയ മാനസികാഘാതത്തിനിടയിലും ഇന്ത്യൻ ക്രിക്കറ്റ് താരം റിങ്കു സിങ് ദേശീയ ടീമിനൊപ്പം ചേരാൻ ഒരുങ്ങുന്നു. വെസ്റ്റ് ഇൻഡീസിനെതിരായ നിർണ്ണായക സൂപ്പർ-8 പോരാട്ടത്തിന് മുന്നോടിയായി താരം ഇന്ന് കൊൽക്കത്തയിലെത്തുമെന്ന് B ബി.സി.സി.ഐ വൃത്തങ്ങൾ സ്ഥിരീകരിച്ചു.
കരളിലെ ക്യാൻസറിനെതിരെ ചികിത്സയിൽ കഴിയവെയാണ് ഗ്രേറ്റർ നോയിഡയിലെ ആശുപത്രിയിൽ റിങ്കുവിന്റെ പിതാവ് ഖാൻചന്ദ് സിംഗ് അന്തരിച്ചത്. മരണവാർത്ത അറിഞ്ഞ ഉടൻ ചെന്നൈയിൽ നിന്ന് അലിഗഡിലെ ജന്മനാട്ടിലേക്ക് മടങ്ങിയ താരം, സംസ്കാരച്ചടങ്ങുകൾ പൂർത്തിയാക്കിയതോടെ വീണ്ടും രാജ്യത്തിനായി കളിക്കാൻ മൈതാനത്തേക്ക് തിരികെ എത്തുകയാണ്.
കഴിഞ്ഞ ദിവസങ്ങളിൽ റിങ്കുവിന്റെ ജന്മനാട് അത്യന്തം ഹൃദയഭേദകമായ നിമിഷങ്ങൾക്കാണ് സാക്ഷിയായത്. പിതാവിന്റെ ഭൗതികശരീരം ചുമന്നുകൊണ്ടുള്ള വിലാപയാത്രയിൽ വികാരാധീനനായി തകർന്നുവീഴുന്ന താരത്തിന്റെ ദൃശ്യങ്ങൾ സോഷ്യൽ മീഡിയയിൽ ആരാധകരുടെ കണ്ണുനിറച്ചിരുന്നു. കർശനമായ സുരക്ഷാ സംവിധാനങ്ങൾക്കിടെ ചടങ്ങുകൾ പൂർത്തിയാക്കിയ ശേഷം, വ്യക്തിപരമായ ദുഃഖത്തെക്കാൾ രാജ്യത്തോടുള്ള കടമയ്ക്ക് മുൻഗണന നൽകിയാണ് 27-കാരൻ വീണ്ടും ടീമിനൊപ്പം ചേരുന്നത്.
പിതാവിന്റെ ആരോഗ്യനില ഗുരുതരമായതിനെ തുടർന്ന് നേരത്തെ ടീമിൽ നിന്ന് അവധിയെടുത്ത് നാട്ടിലേക്ക് പോയിരുന്ന താരം, നില മെച്ചപ്പെട്ടതിനെ തുടർന്ന് ടീമിൽ തിരിച്ചെത്തിയെങ്കിലും അധികം വൈകാതെ മരണവാർത്ത അദ്ദേഹത്തെ വീണ്ടും വേദനിപ്പിച്ചു. എന്നിരുന്നാലും ദേശീയ ജേഴ്സിക്കായി പോരാടാനുള്ള പ്രതിബദ്ധതയോടെ റിങ്കു വീണ്ടും മൈതാനത്തിലേക്ക് ഇറങ്ങുകയാണ്.
