ശ്രീലങ്കൻ തീരത്തിനടുത്ത് യുഎസ് നടത്തിയ ആക്രമണത്തിൽ ഇറാനിയൻ നാവികർ കൊല്ലപ്പെട്ടിരുന്നു . ഈ സാഹചര്യത്തിൽ, ശ്രീലങ്കൻ സർക്കാർ 84 മൃതദേഹങ്ങൾ ഇറാനിലേക്ക് അയച്ചിട്ടുണ്ട്. വെള്ളിയാഴ്ച ശ്രീലങ്കൻ പ്രതിരോധ മന്ത്രാലയം ഇക്കാര്യം വെളിപ്പെടുത്തി. മട്ടാല അന്താരാഷ്ട്ര വിമാനത്താവളത്തിൽ നിന്ന് പുറപ്പെട്ട പ്രത്യേക വിമാനത്തിലാണ് മൃതദേഹങ്ങൾ എത്തിച്ചത്.
മാർച്ച് 11 ന് ഗാലെ ചീഫ് മജിസ്ട്രേറ്റ് സമീറ ദോഡൻഗോഡയുടെ ഉത്തരവനുസരിച്ച് മൃതദേഹങ്ങൾ ഇറാനിയൻ എംബസി ഉദ്യോഗസ്ഥർക്ക് കൈമാറി. ഗാലെയിലെ നാഷണൽ ആശുപത്രിയിലെ രണ്ട് മൊബൈൽ കോൾഡ് സ്റ്റോറേജ് യൂണിറ്റുകളിലാണ് ഇവ സൂക്ഷിച്ചിരുന്നത്. ഗാലെ ഹാർബർ പോലീസ് കോടതിയിൽ സമർപ്പിച്ച അപേക്ഷ പ്രകാരമാണ് ജഡ്ജി ഈ ഉത്തരവുകൾ പുറപ്പെടുവിച്ചതെന്ന് മന്ത്രാലയം അറിയിച്ചു.
മാർച്ച് 4 ന് അന്താരാഷ്ട്ര ജലാശയത്തിൽ ഒരു യുഎസ് അന്തർവാഹിനി ഐറിസ് ഡാനയെ ഒരു ടോർപ്പിഡോ ഉപയോഗിച്ച് ആക്രമിച്ച് മുക്കുകയായിരുന്നു . ഇത് യുഎസ് പ്രതിരോധ സെക്രട്ടറി പീറ്റ് ഹെഗ്സെത്ത് സ്ഥിരീകരിച്ചു. “നമ്മുടെ അന്തർവാഹിനി നടത്തിയ ടോർപ്പിഡോ ആക്രമണത്തിൽ കപ്പൽ മുങ്ങി. രണ്ടാം ലോക മഹായുദ്ധത്തിനുശേഷം ഒരു ശത്രു കപ്പലിനെ ടോർപ്പിഡോ ഉപയോഗിച്ച് മുക്കുന്നത് ഇതാദ്യമാണ്,” അദ്ദേഹം പറഞ്ഞു.
എന്നാൽ , ആക്രമണത്തെക്കുറിച്ച് യുഎസ് തങ്ങൾക്ക് മുൻകൂട്ടി ഒരു വിവരവും നൽകിയിട്ടില്ലെന്ന് ശ്രീലങ്കൻ സർക്കാർ വ്യക്തമാക്കി. സംഭവത്തെക്കുറിച്ച് സംസാരിച്ച ശ്രീലങ്കൻ ആരോഗ്യ-പ്രക്ഷേപണ മന്ത്രി നളിന്ദ ജയതിസ്സ, തങ്ങളുടെ നാവികസേന ഉടൻ തന്നെ പ്രതികരിക്കുകയും രക്ഷാപ്രവർത്തനങ്ങൾ ആരംഭിക്കുകയും ചെയ്തുവെന്ന് അറിയിച്ചിരുന്നു . സംഭവത്തിൽ ആകെ 87 മൃതദേഹങ്ങൾ കണ്ടെടുത്തു, 32 പേരെ രക്ഷപ്പെടുത്തി. ഇതിൽ 10 പേർ ഇപ്പോഴും ആശുപത്രിയിൽ ചികിത്സയിലാണ്. ഫെബ്രുവരിയിൽ വിശാഖപട്ടണത്ത് നടന്ന നാവിക അഭ്യാസത്തിൽ ഈ ഇറാനിയൻ യുദ്ധക്കപ്പൽ പങ്കെടുത്തശേഷം തിരികെ പോവുകയായിരുന്നു.
