റഷ്യയുടെ സ്വർണ്ണ ശേഖരത്തിന്റെ മൂല്യം എക്കാലത്തെയും ഉയർന്ന നിരക്കിൽ

റഷ്യയുടെ സെൻട്രൽ ബാങ്ക് പുറത്തുവിട്ട പുതിയ കണക്കുകൾ പ്രകാരം രാജ്യത്തിന്റെ സ്വർണ്ണ ശേഖരത്തിന്റെ മൂല്യം എക്കാലത്തെയും ഉയർന്ന നിലയിലെത്തി. ഫെബ്രുവരി 1 ലെ കണക്കനുസരിച്ച് റഷ്യയുടെ സ്വർണ്ണ നിക്ഷേപം 402.7 ബില്യൺ ഡോളറാണ്, 400 ബില്യൺ ഡോളർ എന്ന നിർണായക പരിധി ആദ്യമായി മറികടന്നതാണിത്.

നിലവിൽ റഷ്യയുടെ മൊത്തം വിദേശ കരുതൽ ശേഖരത്തിന്റെ 48.3 ശതമാനവും സ്വർണ്ണമാണ്. രാജ്യത്തിന്റെ ആകെ റിസർവ് 833.5 ബില്യൺ ഡോളറായാണ് കണക്കാക്കുന്നത്. ഇതോടെ റഷ്യ കൈവശം വയ്ക്കുന്ന സ്വർണ്ണത്തിന്റെ മൂല്യം വിദേശ കറൻസികളുടെ മൂല്യത്തിന് തുല്യമായ നിലയിലെത്തി.

ആഗോള സ്വർണ്ണ വിലയിൽ ഉണ്ടായ വൻ കുതിപ്പാണ് ഈ വർധനവിന് പ്രധാന കാരണം. ജനുവരി അവസാനത്തോടെ സ്വർണ്ണ ഫ്യൂച്ചറുകൾ ഔൺസിന് 5,595 ഡോളർ എന്ന റെക്കോർഡ് ഉയരത്തിലെത്തി. 2025-ൽ മാത്രം സ്വർണ്ണവില ഏകദേശം 60 ശതമാനം ഉയർന്നുവെന്നും, 2022-ൽ ഔൺസിന് 2,000 ഡോളറിന് താഴെയായിരുന്ന വിലയുമായി താരതമ്യപ്പെടുത്തുമ്പോൾ കഴിഞ്ഞ നാല് വർഷത്തിനിടെ ഗണ്യമായ വർധനവുണ്ടായെന്നും കണക്കുകൾ വ്യക്തമാക്കുന്നു. കേന്ദ്ര ബാങ്കുകളുടെ ശക്തമായ വാങ്ങൽ, ഉയർന്ന പണപ്പെരുപ്പം, വർധിച്ച ഭൗമരാഷ്ട്രീയ പിരിമുറുക്കങ്ങൾ, യുഎസ് ഡോളറിന്റെ മൂല്യത്തകർച്ച എന്നിവയാണ് സ്വർണ്ണവില കുതിക്കാൻ കാരണങ്ങളെന്ന് സാമ്പത്തിക വിദഗ്ധർ വിലയിരുത്തുന്നു.

സ്വർണ്ണത്തിന്റെ മൂല്യം ഉയർന്നതോടെ റഷ്യയുടെ റിസർവ് ഘടനയിലും വലിയ മാറ്റമാണ് ഉണ്ടായിരിക്കുന്നത്. ഉക്രെയ്ൻ സംഘർഷത്തിന് മുമ്പ് സ്വർണ്ണത്തിന്റെ വിഹിതം 21 ശതമാനമായിരുന്നുവെങ്കിൽ, വിദേശ കറൻസികളുടെ വിഹിതം 2022 ഫെബ്രുവരി 1 ന് ഉണ്ടായിരുന്ന 74 ശതമാനത്തിൽ നിന്ന് വലിയ തോതിൽ കുറഞ്ഞു.

പടിഞ്ഞാറൻ രാജ്യങ്ങൾ മരവിപ്പിച്ച റഷ്യൻ സോവറിൻ റിസർവുകളാൽ ഉണ്ടായ നഷ്ടത്തിന്റെ ഭൂരിഭാഗവും സ്വർണ്ണവിലയിലെ ഈ വർധനവ് നികത്തിയതായും റിപ്പോർട്ടുകൾ സൂചിപ്പിക്കുന്നു. മരവിപ്പിച്ച കരുതൽ ശേഖരം ഇപ്പോഴും ലഭ്യമല്ലെങ്കിലും, സ്വർണ്ണത്തിന്റെ ഉയർന്ന മൂല്യം രാജ്യത്തിന്റെ നഷ്ടപ്പെട്ട സാമ്പത്തിക ശേഷി വലിയ തോതിൽ പുനഃസ്ഥാപിച്ചതായി വിലയിരുത്തുന്നു.

അതേസമയം, സമീപ വർഷങ്ങളിൽ സ്വർണ്ണത്തിന്റെ ഭൗതിക അളവിൽ വലിയ മാറ്റമൊന്നും ഉണ്ടായിട്ടില്ലെന്ന് റഷ്യയുടെ സെൻട്രൽ ബാങ്ക് വ്യക്തമാക്കുന്നു. ബാങ്ക് ഓഫ് റഷ്യയുടെ കണക്കുകൾ പ്രകാരം, 2022 മാർച്ച് 1 ന് 73.9 ദശലക്ഷം ട്രോയ് ഔൺസ് സ്വർണ്ണമായിരുന്നു രാജ്യത്തിനുണ്ടായിരുന്നത്. ഈ വർഷം ജനുവരി 1 ആയപ്പോഴേക്കും ഇത് നേരിയ തോതിൽ ഉയർന്ന് 74.8 ദശലക്ഷം ഔൺസായി.

2022 മുതൽ അന്താരാഷ്ട്ര നാണയ നിധിക്ക് (IMF) സ്വർണ്ണ ഇടപാടുകൾ റിപ്പോർട്ട് ചെയ്യുന്നത് റഷ്യ നിർത്തിയിട്ടുണ്ട്. ഇതോടെ, റഷ്യയുടെ സ്വർണ്ണ ശേഖരത്തിന്റെ മൂല്യത്തിൽ അടുത്തകാലത്ത് ഉണ്ടായ വൻ വർധനവ് കൈവശമുള്ള സ്വർണ്ണത്തിന്റെ അളവിലല്ല, മറിച്ച് ആഗോള വിപണിയിലെ വിലക്കുതിപ്പിലാണെന്ന് വ്യക്തമാണ്.