വരാനിരിക്കുന്ന നിയമസഭാ തെരഞ്ഞെടുപ്പിനെ മുന്നിൽക്കണ്ട് കോൺഗ്രസിൽ വലിയ അഴിച്ചുപണി അനിവാര്യമാണെന്ന നിലപാടുമായി മുതിർന്ന നേതാവ് പി.ജെ. കുര്യൻ രംഗത്തെത്തി. പ്രതിപക്ഷ നേതാവ് വി.ഡി. സതീശൻ മുന്നോട്ടുവച്ച യുവത്വത്തിന് പ്രാധാന്യം നൽകുന്ന നയത്തെ പൂർണ്ണമായി പിന്തുണയ്ക്കുന്നുവെന്നും, താനുൾപ്പെടെയുള്ള മുതിർന്ന നേതാക്കൾ ഇത്തവണ മത്സരരംഗത്ത് നിന്ന് മാറിനിൽക്കേണ്ടതുണ്ടെന്നും അദ്ദേഹം വ്യക്തമാക്കി.
കോൺഗ്രസിൽ മുഖ്യമന്ത്രി പദവി സ്വപ്നം കണ്ട് ഒരു ഡസനോളം നേതാക്കൾ നടക്കുന്നുണ്ടെന്നു പരിഹസിച്ച കുര്യൻ, ഇത്തവണ എംപിമാരെ നിയമസഭാ തെരഞ്ഞെടുപ്പിൽ മത്സരിപ്പിക്കാൻ സാധ്യത കുറവാണെന്നും പറഞ്ഞു. ഏകദേശം 50 സീറ്റുകളിൽ സ്ഥാനാർത്ഥികളെ മുൻകൂട്ടി നിശ്ചയിക്കാൻ പാർട്ടിക്കുള്ളിൽ നീക്കങ്ങൾ നടക്കുന്നതായും അദ്ദേഹം വെളിപ്പെടുത്തി.
അതേസമയം, ലൈംഗിക പീഡന ആരോപണങ്ങൾ നേരിടുന്ന രാഹുൽ മാങ്കൂട്ടത്തിലിന് സീറ്റ് നൽകരുതെന്നും, തെരഞ്ഞെടുപ്പിൽ സ്ഥാനാർത്ഥി നിർണയത്തിന് ഭാഷയോ സൗന്ദര്യമോ അല്ല മാനദണ്ഡമാകേണ്ടതെന്നും പി.ജെ. കുര്യൻ കൂട്ടിച്ചേർത്തു.
