പാലക്കാട് പുതുശേരിയിൽ കഴിഞ്ഞ ദിവസം കുട്ടികളുടെ കരോൾ സംഘത്തിന് നേരെയുണ്ടായ ആർഎസ്എസ് ആക്രമണത്തിൽ പ്രതിഷേധിച്ച് ഡിവൈഎഫ്ഐ പ്രതിഷേധ കരോൾ സംഘടിപ്പിച്ചു. ഡിവൈഎഫ്ഐ പുതുശേരി ബ്ലോക്ക് കമ്മിറ്റി സംഘടിപ്പിച്ച പരിപാടിയിൽ നൂറിലധികം പ്രവർത്തകർ പങ്കെടുത്തു.
ആർഎസ്എസിന്റെ അതിക്രമങ്ങൾക്കെതിരെ പ്രതിഷേധം തുടരുമെന്ന് ഡിവൈഎഫ്ഐ ജില്ലാ പ്രസിഡൻറ് ആർ. ജയദേവൻ പറഞ്ഞു. കേരളത്തിന്റെ മതേതരത്വം തകർക്കാൻ അനുവദിക്കില്ലെന്ന് സിപിഐ എം പുതുശേരി ഏരിയ സെക്രട്ടറി നിതിൻ കണിച്ചേരിയും വ്യക്തമാക്കി.
പരിപാടിയിൽ ഡിവൈഎഫ്ഐ ജില്ലാ സെക്രട്ടറിയേറ്റംഗം എം. എ. ജിതിൻരാജ്, ബ്ലോക്ക് സെക്രട്ടറി ആർ. മിഥുൻ, പ്രസിഡൻറ് വി. ബിജോയ്, സിപിഐ എം ഏരിയ കമ്മിറ്റിയംഗങ്ങളായ എസ്. ബി. രാജു, എസ്. സുഭാഷ്, ലോക്കൽ സെക്രട്ടറിമാരായ കെ. സുരേഷ്, സി. പ്രശാന്ത് എന്നിവർ പങ്കെടുത്തു.
