കെപിസിസിയുടെ ഡിജിറ്റൽ മീഡിയ സെല്ലിന്റെ ചുമതല എറണാകുളം എംപി ഹൈബി ഈഡന് നൽകാൻ കോൺഗ്രസ് ദേശീയ നേതൃത്വം തീരുമാനിച്ചു. നിലവിലെ ചെയർമാനായ വി. ടി. ബൽറാമിനെ മാറ്റിയാണ് ഹൈബിക്ക് പുതിയ ഉത്തരവാദിത്തം ലഭിച്ചത്.
ഡിജിറ്റൽ മീഡിയ സെൽ ഇനി മുതൽ ‘സോഷ്യൽ മീഡിയ സെൽ’ എന്ന പേരിലാണ് പ്രവർത്തിക്കുക. ദേശീയ തലത്തിലും മറ്റ് സംസ്ഥാനങ്ങളിലും ഇതേ പേരിലാണ് സൈബർ പ്രചാരണം നടക്കുന്നത്.
ജിഎസ്ടി പരിഷ്‌കരണത്തെ പരിഹസിച്ച് കോൺഗ്രസിന്റെ കേരള ഘടകം എക്‌സിൽ പങ്കുവെച്ച ‘ബീഡി-ബിഹാർ’ പോസ്റ്റാണ് അടുത്തിടെ വിവാദമായത്. ഈ സംഭവത്തെ തുടർന്ന് വി. ടി. ബൽറാം ചുമതല ഒഴിഞ്ഞിരുന്നുവെങ്കിലും കെപിസിസി അന്ന് അദ്ദേഹത്തിന്റെ രാജി സ്വീകരിച്ചിരുന്നില്ല.
