ബലാത്സംഗ കേസിൽ പാലക്കാട് എംഎൽഎ രാഹുൽ മാങ്കൂട്ടത്തിന്റെ മുൻകൂർ ജാമ്യാപേക്ഷ ബുധനാഴ്ച പരിഗണിക്കാനിരിക്കുകയാണ്. കേസ് തിരുവനന്തപുരം സെഷൻസ് കോടതി പരിശോധിക്കും. യുവതിയുടെ പരാതിയെ തുടർന്ന് പൊലീസ് കേസ് രജിസ്റ്റർ ചെയ്തതോടെയാണ് രാഹുൽ മുൻകൂർ ജാമ്യത്തിനായി കോടതിയെ സമീപിച്ചത്.
എല്ലാ ആരോപണങ്ങളും തള്ളി കൊണ്ടാണ് രാഹുൽ ഹർജി സമർപ്പിച്ചിരിക്കുന്നത്. അഭിഭാഷകനായ ശാസ്തമംഗലം അജിത് കുമാറാണ് രാഹുലിന് വേണ്ടി ഹർജി നൽകിയിരിക്കുന്നത്. പരാതിക്കാരിയായ യുവതിയുമായി ദീർഘകാലമായി സൗഹൃദം ഉണ്ടായിരുന്നുവെന്നും, യുവതി ഉന്നയിച്ച ബലാത്സംഗവും ഗർഭഛിദ്രവുമായി ബന്ധപ്പെട്ട ആരോപണങ്ങളും അടിസ്ഥാനരഹിതമാണെന്നും ഹർജിയിൽ വ്യക്തമാക്കുന്നു.
അന്വേഷണത്തിന് പൂർണ്ണമായും സഹകരിക്കുമെന്നും ജാമ്യം അനുവദിക്കണമെന്നുമാണ് രാഹുലിന്റെ അഭ്യർത്ഥനം. നിലവിലെ അറസ്റ്റ് നീക്കങ്ങൾ രാഷ്ട്രീയ പ്രേരിതമാണെന്നുമാണ് ഹർജിയിലെ ആരോപണം.
ഇതിനിടെ, യുവതി വ്യാഴാഴ്ച മുഖ്യമന്ത്രി പിണറായി വിജയന് നേരിട്ട് പരാതി നൽകുകയും ചെയ്തു. രാഹുൽ മാങ്കൂട്ടത്തിൽ നടത്തിയ ക്രൂരമായ പീഡനത്തെ കുറിച്ചുള്ള യുവതിയുടെ മൊഴിയുടെ അടിസ്ഥാനത്തിലാണ് പൊലീസ് എഫ്‌.ഐ.ആർ രജിസ്റ്റർ ചെയ്തത്. തുടർന്ന് വെള്ളിയാഴ്ച നെയ്യാറ്റിൻകര ജെഎഫ്സിഎം-7 കോടതിയിൽ യുവതിയുടെ രഹസ്യമൊഴി രേഖപ്പെടുത്തി. തിരുവനന്തപുരം നഗരത്തിലെ ഒരു ഫ്ലാറ്റിൽ രണ്ട് തവണ ബലാത്സംഗം നടന്നതായാണ് മൊഴിയിൽ പറയുന്നത്.
