രാജ്യത്തെ വനിതാ ക്രിക്കറ്റ് താരങ്ങളെ കൂടുതൽ പ്രോത്സാഹിപ്പിക്കുന്നതിന്റെ ഭാഗമായി ആഭ്യന്തര തലത്തിൽ ഏകീകൃത ശമ്പള നിരക്ക് നടപ്പാക്കാൻ ഇന്ത്യൻ ക്രിക്കറ്റ് കൺട്രോൾ ബോർഡ് (ബിസിസിഐ) തീരുമാനിച്ചു. തിങ്കളാഴ്ച ചേർന്ന അപെക്സ് കൗൺസിൽ യോഗത്തിലാണ് ഇതുസംബന്ധിച്ച നിർണായക തീരുമാനം എടുത്തത്. സീനിയർ വനിതാ ആഭ്യന്തര ടൂർണമെന്റുകളിൽ പ്ലേയിങ് ഇലവനിൽ ഉൾപ്പെടുന്ന താരങ്ങൾക്ക് പ്രതിദിനം 50,000 രൂപയും, റിസർവ് ടീം അംഗങ്ങൾക്ക് 25,000 രൂപയും നൽകാനാണ് തീരുമാനം.
ടി20 മത്സരങ്ങളിൽ പ്ലേയിങ് ഇലവനിലുള്ള താരങ്ങൾക്ക് 25,000 രൂപയും, റിസർവ് ടീമിലെ താരങ്ങൾക്ക് 12,500 രൂപയും പ്രതിദിന ഫീസായി നൽകും. ജൂനിയർ വനിതാ ടൂർണമെന്റുകളിൽ പ്ലേയിങ് ഇലവനിൽ ഉള്ളവർക്ക് 25,000 രൂപയും, റിസർവ് ടീമിന് 12,500 രൂപയും ലഭിക്കും. ജൂനിയർ ടി20 മത്സരങ്ങളിൽ പ്ലേയിങ് ഇലവനിലെ താരങ്ങൾക്ക് 11,500 രൂപയും, റിസർവ് ടീമിന് 6,250 രൂപയും ആയിരിക്കും പ്രതിദിന ഫീസ്.
വനിതാ ക്രിക്കറ്റിനെ കൂടുതൽ ശക്തിപ്പെടുത്താനുള്ള ബിസിസിഐയുടെ ശ്രമങ്ങളുടെ ഭാഗമായാണ് മത്സര ഫീസ് വർധിപ്പിക്കുന്നത്. ഇതിലൂടെ കൂടുതൽ യുവ താരങ്ങളെ ക്രിക്കറ്റിലേക്ക് ആകർഷിക്കാനാകുമെന്ന് ബോർഡ് പ്രതീക്ഷിക്കുന്നു. വനിതാ ക്രിക്കറ്റിൽ ഇത് ശ്രദ്ധേയമായ വർധനവാണെങ്കിലും, പുരുഷ-വനിതാ ക്രിക്കറ്റിലെ ശമ്പള ഘടനയിൽ ഇപ്പോഴും വലിയ അന്തരം നിലനിൽക്കുന്നുണ്ട്.
നിലവിൽ പുരുഷ ക്രിക്കറ്റിൽ, 40 രഞ്ജി മത്സരങ്ങളിൽ കൂടുതൽ കളിച്ച താരങ്ങൾക്ക് പ്രതിദിനം 60,000 രൂപയും, 21 മുതൽ 40 വരെ മത്സരങ്ങൾ കളിച്ചവർക്ക് 50,000 രൂപയും, 20 മത്സരങ്ങൾ വരെ കളിച്ചവർക്ക് 40,000 രൂപയും ബിസിസിഐ നൽകുന്നുണ്ട്. ഇതിന് പുറമെ, ഓരോ വിഭാഗത്തിനും നിശ്ചയിച്ച കരുതൽ തുകയും ലഭിക്കും.
അതേസമയം, സീനിയർ പുരുഷ ക്രിക്കറ്റർമാർക്ക് എ പ്ലസ്, എ, ബി, സി എന്നീ നാല് ഗ്രേഡുകളിലായി വാർഷിക റിട്ടെയ്നർ ശമ്പള സംവിധാനമാണ് നിലവിലുള്ളത്. വർഷം മുഴുവൻ കളിക്കുന്ന മത്സരങ്ങളുടെ എണ്ണത്തിൽ നിന്ന് സ്വതന്ത്രമായാണ് ഈ ശമ്പളം നൽകുന്നത്.
