സിഎച്ച് കണാരൻ സ്മൃതി കുടീരം സ്ക്വയർ ഉദ്ഘാടനം ചെയ്ത് മുഖ്യമന്ത്രി പിണറായി വിജയൻ സിഎച്ച് കണാരൻ പാർട്ടി വളർച്ചയിൽ നിർണായക പങ്കുവഹിച്ച നേതാവാണെന്ന് അനുസ്മരിച്ചു. കമ്മ്യൂണിസ്റ്റ് പ്രസ്ഥാനത്തെ ശക്തിപ്പെടുത്തുന്നതിൽ അദ്ദേഹത്തിന്റെ സംഭാവനകൾ വലുതാണെന്നും മുഖ്യമന്ത്രി പറഞ്ഞു.
ഇതിനൊപ്പം അന്താരാഷ്ട്ര വിഷയങ്ങളിലും അദ്ദേഹം പ്രതികരിച്ചു. ലോകമെമ്പാടുമുള്ള ലക്ഷക്കണക്കിന് ആളുകൾ ആശങ്കയിൽ കഴിയുന്ന സാഹചര്യമാണ് നിലവിലുള്ളതെന്നും, അമേരിക്കയുടെ “വന്യമൃഗരീതി” ലോകത്ത് വലിയ അശാന്തിക്ക് കാരണമാകുന്നതായും അദ്ദേഹം വിമർശിച്ചു.
സംസ്ഥാന രാഷ്ട്രീയത്തെയും മുഖ്യമന്ത്രി വിമർശനവിധേയമാക്കി. യുഡിഎഫും ബിജെപിയും കോർപ്പറേറ്റുകളുടെ പുരോഗതിയെയാണ് മുൻനിർത്തുന്നതെന്ന് ആരോപിച്ച അദ്ദേഹം, മുൻപ് യുഡിഎഫ് കൺവീനർ ലൈഫ് മിഷൻ പദ്ധതി നിർത്തലാക്കുമെന്ന് പറഞ്ഞതും ചൂണ്ടിക്കാട്ടി.
എൽഡിഎഫ് ഭരണകാലത്ത് സംസ്ഥാനത്ത് കൈവരിച്ച നേട്ടങ്ങളും മുഖ്യമന്ത്രി വിശദീകരിച്ചു. അതിദാരിദ്ര്യമുക്ത പ്രഖ്യാപനം ലോകശ്രദ്ധ നേടിയതായും, ലൈഫ് മിഷൻ പദ്ധതിയിലൂടെ 5 ലക്ഷം വീടുകൾ നിർമ്മിച്ച് 20 ലക്ഷത്തിലധികം പേർക്ക് വീട് നൽകാനായതും ഉദാഹരണങ്ങളാണെന്നും അദ്ദേഹം പറഞ്ഞു. ഈ നേട്ടങ്ങൾ എല്ലാം എൽഡിഎഫ് തുടർഭരണത്തിലൂടെയാണ് സാധ്യമായതെന്നും അദ്ദേഹം കൂട്ടിച്ചേർത്തു.
യുദ്ധസാഹചര്യങ്ങളുടെ പ്രതിഫലനം രാജ്യത്തിനകത്തും പ്രകടമാണെന്ന് മുഖ്യമന്ത്രി ചൂണ്ടിക്കാട്ടി. ഹോട്ടൽ വ്യവസായത്തെയും അടുക്കള ചെലവുകളെയും യുദ്ധം ബാധിച്ചിട്ടുണ്ടെന്നും അദ്ദേഹം പറഞ്ഞു. ഗൾഫ് മേഖലയിലും ഈ അശാന്തിയുടെ സ്വാധീനം പ്രകടമാണെന്നും, അവിടെ ജോലി ചെയ്യുന്ന മലയാളികൾക്ക് തൊഴിൽ നഷ്ടപ്പെടുമോ എന്ന ആശങ്ക ഉയർന്നുവരുന്നതായും മുഖ്യമന്ത്രി കൂട്ടിച്ചേർത്തു.
