രാഹുല്‍ മാങ്കൂട്ടത്തില്‍ എംഎല്‍എയ്‌ക്കെതിരായ ലൈംഗിക പീഡനപരാതി അന്വേഷിക്കാന്‍ പ്രത്യേക അന്വേഷണസംഘം രൂപീകരിച്ചിട്ടുണ്ട്. എസിപി വി. എസ്. ദിനരാജ് അന്വേഷണ ഉദ്യോഗസ്ഥനായി രിക്കും . അന്വേഷണത്തിന് മേല്‍നോട്ടം വഹിക്കുന്നത് ഡിസിപി ദീപക് ദിന്‍കറാണ്. പ്രത്യേക സംഘം ഉടന്‍ പ്രവര്‍ത്തന സജ്ജമാക്കുമെന്നും തിരുവനന്തപുരം സിറ്റി പൊലീസ് കമ്മീഷണര്‍ തോംസൺ ജോസ് അറിയിച്ചു.
കേസ് രജിസ്റ്റർ ചെയ്തിട്ടുണ്ടെന്നും, നിലവിൽ കൂടുതൽ വിവരങ്ങൾ പങ്കുവെക്കാനാകില്ലെന്നും കമ്മീഷണർ വ്യക്തമാക്കി.
എഫ്‌ഐആറിൽ രാഹുൽ മാങ്കൂട്ടത്തിലിനെതിരെ ഗുരുതര ആരോപണങ്ങളാണ് ഉന്നയിച്ചിരിക്കുന്നത്. 2025 മാർച്ച് 4-ന് തൃക്കണ്ണാപുരത്തിലെ അതിജീവിതയുടെ ഫ്ലാറ്റിൽ ശാരീരിക ഉപദ്രവവും ലൈംഗിക പീഡനവും നടന്നു എന്ന് രേഖപ്പെടുത്തിയിട്ടുണ്ട്. മാർച്ച് 17-ന് ഭീഷണിപ്പെടുത്തി പരാതിക്കാരിയുടെ നഗ്നദൃശ്യങ്ങൾ പകർത്തിയതായും എഫ്‌ഐആറിൽ പറയുന്നു. അതിജീവിത ഗർഭിണിയാണെന്ന് അറിഞ്ഞിട്ടും പീഡനം തുടർന്നുവെന്ന് വിവരം ചൂണ്ടിക്കാട്ടുന്നു.
രാഹുൽ മാങ്കൂട്ടത്തിന് പുറമെ സുഹൃത്തായ അടൂർ സ്വദേശി ജോബി ജോസഫിനെയും കേസിൽ പ്രതിയാക്കിയിട്ടുണ്ട്.
