ഇന്ത്യൻ റെയിൽവേയുടെ ചരിത്രത്തിൽ പുതിയ അധ്യായം കുറിച്ച് രാജ്യത്തെ ആദ്യ വന്ദേ ഭാരത് സ്ലീപ്പർ എക്സ്പ്രസ് ഗുവാഹത്തിയും കൊൽക്കത്തയും തമ്മിൽ ഈ ആഴ്ച തന്നെ സർവീസ് ആരംഭിക്കും. രാത്രികാല ദീർഘദൂര യാത്രകൾ ലക്ഷ്യമിട്ട് പ്രത്യേകം രൂപകൽപ്പന ചെയ്ത ഇന്ത്യയിലെ ആദ്യ വന്ദേ ഭാരത് ട്രെയിനാണിത്.
നിലവിലുള്ള വന്ദേ ഭാരത് ട്രെയിനുകളിൽ നിന്ന് വ്യത്യസ്തമായി സ്ലീപ്പർ സൗകര്യങ്ങളോടെയാണ് ഈ ട്രെയിൻ ഒരുക്കിയിരിക്കുന്നത്. വടക്കുകിഴക്കൻ ഇന്ത്യയെയും കിഴക്കൻ ഇന്ത്യയെയും അതിവേഗത്തിൽ ബന്ധിപ്പിക്കുന്ന ഈ സർവീസ് റെയിൽവേയുടെ ആധുനികവൽക്കരണത്തിലെ നിർണായക നാഴികക്കല്ലായാണ് വിലയിരുത്തപ്പെടുന്നത്.
ആകെ 16 കോച്ചുകളുള്ള ട്രെയിനിൽ 823 യാത്രക്കാർക്ക് ഒരേസമയം യാത്ര ചെയ്യാം. 11 എസി 3-ടയർ കോച്ചുകളും, 4 എസി 2-ടയർ കോച്ചുകളും, ഒരു ഫസ്റ്റ് ക്ലാസ് എസി കോച്ചുമാണ് ഉൾപ്പെടുത്തിയിരിക്കുന്നത്. മികച്ച കുഷ്യൻ ബെർത്തുകൾ, കുറഞ്ഞ ശബ്ദമുള്ള യാത്രയ്ക്കുള്ള സാങ്കേതികവിദ്യ, ആധുനിക സസ്പെൻഷൻ സംവിധാനം എന്നിവയാണ് പ്രധാന സവിശേഷതകൾ.
യാത്രക്കാരുടെ സുരക്ഷ ഉറപ്പാക്കാൻ തദ്ദേശീയമായി വികസിപ്പിച്ച ‘കവച്’ (Kavach) സുരക്ഷാ സംവിധാനം ട്രെയിനിൽ ഘടിപ്പിച്ചിട്ടുണ്ട്. ഭിന്നശേഷിക്കാർക്കായുള്ള പ്രത്യേക സൗകര്യങ്ങൾ, നവീന ശൗചാലയങ്ങൾ, അത്യാധുനിക പാസഞ്ചർ ഇൻഫർമേഷൻ സിസ്റ്റം, ഓട്ടോമാറ്റിക് വാതിലുകൾ എന്നിവയും ഒരുക്കിയിട്ടുണ്ട്. അടിയന്തര സാഹചര്യങ്ങളിൽ ലോക്കോ പൈലറ്റുമായി ബന്ധപ്പെടാൻ ടോക്ക്-ബാക്ക് യൂണിറ്റുകളും സജ്ജീകരിച്ചിട്ടുണ്ട്.
ഏറോഡൈനാമിക് ഡിസൈൻ, അത്യാധുനിക കൺട്രോൾ പാനലുകളോടുകൂടിയ ഡ്രൈവർ ക്യാബിൻ എന്നിവ തദ്ദേശീയ റെയിൽവേ എഞ്ചിനീയറിംഗിന്റെ ശക്തി തെളിയിക്കുന്നതാണ്. ഈ സർവീസ് അസം, പശ്ചിമ ബംഗാൾ സംസ്ഥാനങ്ങൾക്കിടയിലെ കണക്റ്റിവിറ്റിയിൽ വലിയ മാറ്റം ഉണ്ടാക്കുമെന്ന് റെയിൽവേ വിലയിരുത്തുന്നു.
അസമിലെ കാമരൂപ് മെട്രോപൊളിറ്റൻ, ബോംഗൈഗാവ് ജില്ലകൾക്കും പശ്ചിമ ബംഗാളിലെ കൂച്ച്ബെഹാർ, ജൽപായ്ഗുരി, മാൾഡ, മുർഷിദാബാദ്, പുർബ ബർധമാൻ, ഹൂഗ്ലി, ഹൗറ തുടങ്ങിയ ജില്ലകൾക്കും ഈ ട്രെയിൻ വലിയ ഗുണം ചെയ്യും. ദീർഘദൂര രാത്രി യാത്രകൾ വേഗതയിലും സൗകര്യത്തിലും പുതുയുഗത്തിലേക്ക് നയിക്കുമെന്ന പ്രതീക്ഷയിലാണ് ഇന്ത്യൻ റെയിൽവേ.
