പിഎസ്സി നടത്തിയ ചില സുപ്രധാന പരീക്ഷകളിൽ ക്രമക്കേട് നടന്നെന്ന ആരോപണത്തെ തുടർന്ന് അന്വേഷണത്തിന് സർക്കാർ തീരുമാനിച്ചു. പരീക്ഷാ ക്രമക്കേടുകൾ അതീവ ഗുരുതരമാണെന്നാണ് മുഖ്യമന്ത്രിയുടെ ഓഫീസ് വിലയിരുത്തിയത്.
ഇന്നലെ ചേർന്ന മന്ത്രിസഭാ യോഗത്തിൽ പിഎസ്സി പരീക്ഷാ ക്രമക്കേട് വിശദമായി ചർച്ചയായി. തുടർന്നാണ് സംഭവത്തിൽ അന്വേഷണം നടത്താൻ സർക്കാർ തീരുമാനമെടുത്തത്. ക്രമക്കേടിന്റെ വ്യാപ്തിയും ഉത്തരവാദിത്തവും പരിശോധിക്കുന്നതിനായി തുടർനടപടികൾ സ്വീകരിക്കുമെന്ന് സർക്കാർ വൃത്തങ്ങൾ അറിയിച്ചു.
സംസ്ഥാന ആസൂത്രണ ബോർഡിലെ നിർണായക തസ്തികകളിലേക്കുള്ള പരീക്ഷകളിലാണ് ക്രമക്കേട് നടന്നതായി കണ്ടെത്തിയത്. പരീക്ഷയിലെ പത്ത് ചോദ്യങ്ങളുടെ ഉത്തരങ്ങൾ മൂല്യനിർണയം നടത്താതെയാണ് ഫലം പ്രസിദ്ധീകരിച്ചതെന്നാണ് ആരോപണം.
ഒന്നേകാൽ ലക്ഷം രൂപ അടിസ്ഥാന ശമ്പളമുള്ള സംസ്ഥാന ആസൂത്രണ ബോർഡിലെ ഇൻഡസ്ട്രി ആൻഡ് ഇൻഫ്രാസ്ട്രക്ചർ വിഭാഗം ചീഫ്, പേഴ്സ്പെക്ടീവ് പ്ലാനിങ് ഡിവിഷൻ ചീഫ്, പ്ലാനിങ് കോ-ഓർഡിനേഷൻ ഡിവിഷൻ ചീഫ് എന്നീ തസ്തികകളിലേക്കുള്ള പരീക്ഷകളിലാണ് ക്രമക്കേട് നടന്നത്.
സംഭവം പുറത്തുവന്നതിനെ തുടർന്ന് ബന്ധപ്പെട്ട പരീക്ഷകളിൽ പുനർമൂല്യനിർണയം നടത്താനും ആഭ്യന്തര വിജിലൻസ് അന്വേഷണം ആരംഭിക്കാനും നേരത്തെ തന്നെ പിഎസ്സി യോഗം തീരുമാനിച്ചിരുന്നു. ഇപ്പോൾ സർക്കാർ തലത്തിലുള്ള അന്വേഷണവും പ്രഖ്യാപിച്ചതോടെ വിഷയത്തിന് കൂടുതൽ ഗൗരവം കൈവന്നിരിക്കുകയാണ്.
സംസ്ഥാനത്തെ നിയമന നടപടികളുടെ വിശ്വാസ്യതയെ ബാധിക്കുന്ന വിഷയമായതിനാൽ സമഗ്രമായ അന്വേഷണം വേണമെന്ന ആവശ്യം വിവിധ കോണുകളിൽ നിന്ന് ഉയരുന്നുണ്ട്. അന്വേഷണ റിപ്പോർട്ട് ലഭിച്ച ശേഷമാകും തുടർനടപടികൾ സംബന്ധിച്ച് അന്തിമ തീരുമാനം കൈക്കൊള്ളുക.
