കേരളം വികസനത്തിലും സാമൂഹ്യക്ഷേമത്തിലും അതിവേഗം മുന്നേറുകയാണെന്ന് മന്ത്രി പി. രാജീവ് പറഞ്ഞു. പാലക്കാട് ഇൻഡസ്ട്രിയൽ സ്മാർട്ട് സിറ്റി പദ്ധതി ഉദാഹരണമായി ചൂണ്ടിക്കാട്ടിയ മന്ത്രി, വെറും 10 മാസത്തിനകം ഭൂമി ഏറ്റെടുക്കുകയും നിർമാണ പ്രവർത്തനങ്ങൾ ആരംഭിക്കുകയും ചെയ്തതിലൂടെ സർക്കാരിന്റെ കാര്യക്ഷമത തെളിയിക്കുന്നതാണെന്ന് വ്യക്തമാക്കി.
വികസന രംഗത്ത് കേരളം ഒന്നാമതെത്തിയിരിക്കുകയാണെന്നും, അതിനാൽ നിലവിലെ സർക്കാരിനെ വിമർശിക്കാൻ യാതൊരു സാഹചര്യമുമില്ലെന്നും അദ്ദേഹം കൂട്ടിച്ചേർത്തു. നിയമസഭാ തെരഞ്ഞെടുപ്പുമായി ബന്ധപ്പെട്ട് ‘മിഷൻ 110’ എന്ന ലക്ഷ്യത്തെക്കുറിച്ച് അനൗപചാരിക മന്ത്രിസഭാ യോഗത്തിൽ ചർച്ച നടത്തിയതായും മന്ത്രി അറിയിച്ചു.
2011ൽ 72 സീറ്റുകളോടെ അധികാരത്തിലെത്തിയ യുഡിഎഫിന് പിന്നീട് സീറ്റുകൾ കുറഞ്ഞ് നിലവിൽ 41ൽ എത്തിനിൽക്കുകയാണെന്നും (കോൺഗ്രസ് – 21, മുസ്ലിം ലീഗ് – 15), ഇതിന് വിപരീതമായി കഴിഞ്ഞ തെരഞ്ഞെടുപ്പിൽ 91 സീറ്റുകൾ നേടിയ ഇടതുപക്ഷം പിന്നീട് 99 സീറ്റുകളിലേക്ക് മുന്നേറിയതായും അദ്ദേഹം പറഞ്ഞു. ഈ മുന്നേറ്റം തുടരുമെന്നും ലക്ഷ്യം ഇനിയും ഉയർത്തുകയെന്നതാണ് ‘മിഷൻ 110’ന്റെ ഉദ്ദേശമെന്നും പി. രാജീവ് വ്യക്തമാക്കി.
