ഇറാന്റെ പരമോന്നത നേതാവ് ആയത്തുള്ള അലി ഖമേനിയുടെ കൊലപാതകത്തെ വയനാട് കോൺഗ്രസ് എംപി പ്രിയങ്ക ഗാന്ധി ശക്തമായി അപലപിച്ചു. ഞായറാഴ്ച യുഎസ്-ഇസ്രായേൽ സംയുക്ത ആക്രമണത്തിൽ ഖമേനി മരിച്ചതിനെത്തുടർന്ന് പശ്ചിമേഷ്യയിൽ നിലനിന്ന സംഘർഷാവസ്ഥയോട് അവർ പ്രതികരിക്കുകയായിരുന്നു . ലോകത്തിന് ഇപ്പോൾ വേണ്ടത് യുദ്ധമല്ല, സമാധാനമാണെന്ന് പ്രിയങ്ക വ്യക്തമാക്കി.
“കണ്ണിന് കണ്ണ് എന്നത് ലോകത്തെ അന്ധമാക്കുന്നു” എന്ന് മഹാത്മാഗാന്ധി ഈ അവസരത്തിൽ പറഞ്ഞ വാക്കുകൾ പ്രിയങ്ക ഓർമ്മിപ്പിച്ചു. ജനാധിപത്യ രാജ്യങ്ങളെ നയിക്കുന്നവരാണെന്ന് അവകാശപ്പെടുന്നവർ, ഒരു പരമാധികാര രാഷ്ട്രത്തലവനെ ലക്ഷ്യം വയ്ക്കുകയും ആയിരക്കണക്കിന് നിരപരാധികളുടെ ജീവൻ അപഹരിക്കുകയും ചെയ്യുന്നത് ഏറ്റവും നീചമായ പ്രവൃത്തിയാണെന്ന് അവർ പറഞ്ഞു. ഇതിന് എന്ത് കാരണം പറഞ്ഞാലും അത് ന്യായീകരിക്കാനാവില്ലെന്ന് അവർ പറഞ്ഞു. നിരവധി രാജ്യങ്ങൾ ഇപ്പോൾ ഈ സംഘർഷത്തിലേക്ക് വലിച്ചിഴക്കപ്പെടുന്നതിൽ പ്രിയങ്ക ദുഃഖം പ്രകടിപ്പിച്ചു.
അതേസമയം, പ്രധാനമന്ത്രി നരേന്ദ്ര മോദിയെയും പ്രിയങ്ക പരോക്ഷമായി വിമർശിച്ചു. ഇസ്രായേൽ പ്രധാനമന്ത്രിയുടെയും യുഎസ് പ്രസിഡന്റ് ട്രംപിന്റെയും മുന്നിൽ തലകുനിച്ച നമ്മുടെ പ്രധാനമന്ത്രി മോദി, യുദ്ധത്തിൽ തകർന്ന രാജ്യങ്ങളിൽ കുടുങ്ങിയ ഇന്ത്യക്കാരെ സുരക്ഷിതമായി തിരികെ കൊണ്ടുവരാൻ ഇനിയെങ്കിലും പ്രവർത്തിക്കുമെന്ന് പ്രതീക്ഷിക്കുന്നതായി പ്രിയങ്ക പറഞ്ഞു.
