തിരുവനന്തപുരം കോർപ്പറേഷനിൽ ഒറ്റയ്ക്ക് ഭരണം രൂപീകരിക്കാൻ ആവശ്യമായ അംഗബലം ഇല്ലെങ്കിലും മേയർ സ്ഥാനത്തേക്ക് മത്സരിക്കാൻ യുഡിഎഫ് തീരുമാനിച്ചു. തിരുവനന്തപുരം കോർപ്പറേഷനിലെ മേയർ തെരഞ്ഞെടുപ്പിൽ യുഡിഎഫ് സ്ഥാനാർത്ഥിയായി കെ. എസ്. ശബരീനാഥൻ മത്സരിക്കുമെന്നാണ് വിവരം.
ഡെപ്യൂട്ടി മേയർ സ്ഥാനത്തേക്ക് മേരി പുഷ്പവും യുഡിഎഫ് സ്ഥാനാർത്ഥിയായി രംഗത്തുണ്ടാകും. യുഡിഎഫിന്റെ പാർലമെന്ററി പാർട്ടി യോഗത്തിലാണ് ഈ തീരുമാനം കൈക്കൊണ്ടത്. ഭൂരിപക്ഷമില്ലെങ്കിലും മേയർ സ്ഥാനത്തേക്ക് മത്സരിക്കുമെന്ന് സിപിഎമ്മും വ്യക്തമാക്കിയിട്ടുണ്ട്. പുന്നക്കാമുഗൾ കൗൺസിലറും സിപിഎം ജില്ലാ കമ്മിറ്റി അംഗവുമായ ആർ. പി. ശിവജിയാണ് സിപിഎമ്മിന്റെ മേയർ സ്ഥാനാർത്ഥി.
അതേസമയം, തദ്ദേശ തെരഞ്ഞെടുപ്പിൽ തിരുവനന്തപുരം കോർപ്പറേഷനിലെ ഏറ്റവും വലിയ ഒറ്റ കക്ഷിയായ ബിജെപി ഇന്ന് മേയർ സ്ഥാനാർത്ഥിയെ തീരുമാനിക്കുമെന്നാണ് ലഭിക്കുന്ന വിവരം. വി. വി. രാജേഷോ ആർ. ശ്രീലേഖയോ എന്നതിലാണ് ഇപ്പോഴും ആകാംക്ഷ തുടരുന്നത്.
