സോഷ്യൽ മീഡിയ പ്ലാറ്റ്ഫോമായ ഇൻസ്റ്റാഗ്രാമിൽ പ്രധാനമന്ത്രി നരേന്ദ്ര മോദി പുതിയ ലോക റെക്കോർഡ് സൃഷ്ടിച്ചു. 100 മില്യൺ (10 കോടി) ഫോളോവേഴ്സ് എന്ന നാഴികക്കല്ല് പിന്നിടുന്ന ആദ്യ ലോക നേതാവായി അദ്ദേഹം മാറി. 2014 ൽ ഇൻസ്റ്റാഗ്രാമിൽ ചേർന്ന മോദി ഒരു ദശാബ്ദത്തിനുള്ളിൽ ഈ അപൂർവ നേട്ടം കൈവരിക്കുകയായിരുന്നു .
ലോകമെമ്പാടുമുള്ള മറ്റേതൊരു രാഷ്ട്രത്തലവനെയും അപേക്ഷിച്ച് പ്രധാനമന്ത്രി മോദിക്കാണ് ഏറ്റവും കൂടുതൽ ഫോളോവേഴ്സ് ഉള്ളത്. രണ്ടാം സ്ഥാനത്തുള്ള യുഎസ് പ്രസിഡന്റ് ഡൊണാൾഡ് ട്രംപിന്റെ (43.2 മില്യൺ) ഫോളോവേഴ്സിന്റെ ഇരട്ടിയിലധികം മോദിക്കുണ്ട്. മാത്രമല്ല, അടുത്ത അഞ്ച് ലോക നേതാക്കളുടെ ഫോളോവേഴ്സിന്റെ എണ്ണം കൂടി ചേർത്താലും മോദിയുടെ എണ്ണവുമായി പൊരുത്തപ്പെടാൻ കഴിയില്ല എന്നത് ശ്രദ്ധേയമാണ്. ഇന്തോനേഷ്യൻ പ്രസിഡന്റ് പ്രബോവോ സുബിയാന്റോയും (15 മില്യൺ) ബ്രസീലിയൻ പ്രസിഡന്റ് ലുലയും (14.4 മില്യൺ) പട്ടികയിൽ അടുത്ത സ്ഥാനത്താണ്.
ആഭ്യന്തരമായും മോദി മറ്റ് രാഷ്ട്രീയ നേതാക്കളേക്കാൾ വളരെ മുന്നിലാണ്. ഏകദേശം 16.1 മില്യൺ ഫോളോവേഴ്സുമായി ഉത്തർപ്രദേശ് മുഖ്യമന്ത്രി യോഗി ആദിത്യനാഥ് രണ്ടാം സ്ഥാനത്തും, 12.6 മില്യൺ ഫോളോവേഴ്സുമായി കോൺഗ്രസ് നേതാവ് രാഹുൽ ഗാന്ധി മൂന്നാം സ്ഥാനത്തും ഉണ്ട് . മറ്റ് സോഷ്യൽ മീഡിയ പ്ലാറ്റ്ഫോമുകളിലും മോദിക്ക് വലിയ ഫോളോവേഴ്സ് ഉണ്ട്. ട്വിറ്ററിൽ 106.2 മില്യൺ ഫോളോവേഴ്സും ഫേസ്ബുക്കിൽ 54 മില്യൺ ഫോളോവേഴ്സും അദ്ദേഹത്തിനുണ്ട്.
സോഷ്യൽ മീഡിയയിൽ മാത്രമല്ല, ലോക നേതാക്കളുടെ അംഗീകാര റേറ്റിംഗിലും മോദി ഒന്നാം സ്ഥാനത്താണ്. ഈ വർഷം ഫെബ്രുവരി ആദ്യം അമേരിക്കൻ ആസ്ഥാനമായുള്ള മോർണിംഗ് കൺസൾട്ട് നടത്തിയ ഒരു സർവേയിൽ, 67 ശതമാനം അംഗീകാര റേറ്റിംഗുമായി മോദി ഒന്നാം സ്ഥാനത്തെത്തി. അതേ സർവേയിൽ, 40 ശതമാനം റേറ്റിംഗുമായി ട്രംപ് പതിനൊന്നാം സ്ഥാനത്തായിരുന്നു.
