ചിറ്റൂരിൽ നിന്ന് കാണാതായ ആറുവയസ്സുകാരനായ സുഹാന്റെ മൃതദേഹം കണ്ടെത്തി. വീടിന് സമീപത്തെ കുളത്തിൽ നിന്നാണ് കുഞ്ഞിന്റെ മൃതദേഹം ലഭിച്ചത്. അമ്പാട്ടു പാളയം സ്വദേശി മുഹമ്മദ് അനസ്–തൗഹിത ദമ്പതികളുടെ മകനായ സുഹാൻ ഇന്നലെ രാവിലെ 11 മണിയോടെയാണ് കാണാതായത്.
വീടിന്റെ മുറ്റത്ത് കളിച്ചുകൊണ്ടിരിക്കെയായിരുന്നു കുഞ്ഞിനെ കാണാതായത്. സഹോദരനുമായി ഉണ്ടായ ചെറിയ തർക്കത്തെ തുടർന്ന് വീട്ടിൽ നിന്ന് ഇറങ്ങിപ്പോയതാകാമെന്ന് കുടുംബം പറഞ്ഞു.
21 മണിക്കൂർ നീണ്ട തിരച്ചിലിനൊടുവിൽ ഇന്ന് രാവിലെ കുളത്തിൽ നടത്തിയ പരിശോധനയിലാണ് മൃതദേഹം കണ്ടെത്തിയത്. ശനിയാഴ്ച രാത്രി 10 മണിവരെ പൊലീസ് നടത്തിയ തിരച്ചിലിൽ യാതൊരു സൂചനയും ലഭിച്ചിരുന്നില്ല.
