മഹാരാഷ്ട്ര ഉപമുഖ്യമന്ത്രി അജിത് പവാറിന്റെ ജീവനെടുത്ത വിമാനാപകടത്തിന്റെ കാരണം തേടിയുള്ള അന്വേഷണം നിർണ്ണായക ഘട്ടത്തിലേക്ക് കടന്നിരിക്കുകയാണ്. തകർന്നുവീണ ലിയർജെറ്റ് 45 എക്സ്.ആർ. വിമാനത്തിന്റെ ബ്ലാക്ക് ബോക്സ് അന്വേഷണ ഉദ്യോഗസ്ഥർ കണ്ടെത്തിയതായി അധികൃതർ അറിയിച്ചു. അപകടത്തിന് തൊട്ടുമുമ്പ് പൈലറ്റുമാർ തമ്മിൽ നടന്ന സംഭാഷണങ്ങൾ അടങ്ങിയ കോക്ക്പിറ്റ് വോയ്സ് റെക്കോഡറും വിമാനത്തിന്റെ സാങ്കേതിക വിവരങ്ങൾ രേഖപ്പെടുത്തിയ ഫ്ളൈറ്റ് ഡാറ്റ റെക്കോഡറും വിശദമായി പരിശോധിക്കുന്നതിലൂടെ ദുരന്തത്തിന്റെ യഥാർത്ഥ കാരണം കണ്ടെത്താനാകുമെന്നാണ് എയർക്രാഫ്റ്റ് ആക്സിഡന്റ് ഇൻവെസ്റ്റിഗേഷൻ ബ്യൂറോയുടെ വിലയിരുത്തൽ.
ബുധനാഴ്ച പുലർച്ചെ ബാരാമതി എയർസ്ട്രിപ്പിന് സമീപമാണ് നാടിനെ നടുക്കിയ ഈ ദുരന്തം സംഭവിച്ചതെന്നാണ് റിപ്പോർട്ടുകൾ. വി.എസ്.ആർ. വെഞ്ചേഴ്സ് എന്ന സ്വകാര്യ സ്ഥാപനത്തിന്റെ ഉടമസ്ഥതയിലുള്ള വിമാനം കനത്ത മൂടൽമഞ്ഞിൽ ലാൻഡിംഗ് ശ്രമിക്കുന്നതിനിടെയാണ് അപകടത്തിൽപ്പെട്ടത്. ഉപമുഖ്യമന്ത്രിയോടൊപ്പം സുരക്ഷാ ഉദ്യോഗസ്ഥൻ, രണ്ട് വൈമാനികർ, ഒരു കാബിൻ ജീവനക്കാരി എന്നിവരും അപകടത്തിൽ മരണപ്പെട്ടു.
ബാരാമതി വിമാനത്താവളത്തിൽ ഇൻസ്ട്രുമെന്റ് ലാൻഡിങ് സിസ്റ്റം (ILS) ഇല്ലാത്തതിനാൽ മാനുവൽ ലാൻഡിങ് ശ്രമിച്ചതാണ് അപകടസാധ്യത വർധിപ്പിച്ചതെന്നാണ് പ്രാഥമിക നിഗമനം. ആദ്യ ലാൻഡിങ് ശ്രമം പരാജയപ്പെട്ടതിനെ തുടർന്ന് വിമാനം വീണ്ടും ഉയർത്താൻ ശ്രമിച്ചെങ്കിലും രണ്ടാം ശ്രമത്തിനിടെ പൈലറ്റ് എയർ ട്രാഫിക് കൺട്രോളിലേക്ക് അടിയന്തര സന്ദേശം അയച്ചതായി അന്വേഷണ സംഘം സ്ഥിരീകരിച്ചു. വെറും 100 അടി ഉയരത്തിൽവെച്ച് വിമാനത്തിന്റെ നിയന്ത്രണം നഷ്ടപ്പെട്ടതോടെ റൺവേയ്ക്ക് സമീപം വിമാനം നിലത്തിടിച്ച് തീപിടിച്ച് പൊട്ടിത്തെറിക്കുകയായിരുന്നു.
അപകടസ്ഥലത്ത് പ്രത്യേക അന്വേഷണ സംഘം ഫോറൻസിക് പരിശോധനകൾ ആരംഭിച്ചിട്ടുണ്ട്. സാങ്കേതിക തകരാറാണോ മനുഷ്യ പിഴവാണോ ദുരന്തത്തിലേക്ക് നയിച്ചതെന്ന് വരും ദിവസങ്ങളിൽ വ്യക്തമാകും. വിമാനത്താവളത്തിലെ സുരക്ഷാ സംവിധാനങ്ങളുടെയും നാവിഗേഷൻ സൗകര്യങ്ങളുടെയും അപര്യാപ്തതകളും അന്വേഷണ പരിധിയിൽ ഉൾപ്പെടുത്തിയിട്ടുണ്ട്.
