2026 ഫിഫ ലോകകപ്പിനായുള്ള തയ്യാറെടുപ്പിന്റെ ഭാഗമായി അർജന്റീന ദേശീയ ഫുട്ബോൾ ടീം കളിക്കാർക്ക് സ്വന്തം നാടിന്റെ ഭക്ഷണശീലം ഉറപ്പാക്കാൻ പ്രത്യേക ക്രമീകരണങ്ങൾ നടത്തി. ടീമിന്റെ ബേസ് ക്യാമ്പിലേക്ക് അർജന്റീനയിൽ നിന്ന് 500 കിലോഗ്രാം ബീഫ് എത്തിച്ചതായാണ് റിപ്പോർട്ടുകൾ.
ദൈർഘ്യമേറിയ ടൂർണമെന്റുകളിൽ കളിക്കാരുടെ ശാരീരികക്ഷമതയും മാനസികാവസ്ഥയും നിലനിർത്തുന്നതിൽ ഭക്ഷണത്തിന് നിർണായക പങ്കുണ്ടെന്ന വിലയിരുത്തലിന്റെ അടിസ്ഥാനത്തിലാണ് ഈ നടപടി. സ്വന്തം രാജ്യത്തെ പരിചിതമായ ഭക്ഷണം ലഭിക്കുന്നത് കളിക്കാരുടെ പ്രകടനത്തിനും വേഗത്തിലുള്ള വീണ്ടെടുപ്പിനും സഹായകരമാകുമെന്നാണ് ടീം മാനേജ്മെന്റിന്റെ വിലയിരുത്തൽ.
ലോമോ, വാസിയോ, എൻട്രാന, മതാംബ്രെ തുടങ്ങിയ അർജന്റീനയിലെ പരമ്പരാഗത മാംസവിഭവങ്ങളാണ് ബേസ് ക്യാമ്പിലേക്ക് എത്തിച്ചിരിക്കുന്നത്. ഇതിനായുള്ള ഒരുക്കങ്ങൾ മാസങ്ങൾക്കുമുമ്പ് തന്നെ ആരംഭിച്ചിരുന്നുവെന്നും, അമേരിക്കയുടെ കസ്റ്റംസ്, ഭക്ഷ്യസുരക്ഷാ മാനദണ്ഡങ്ങൾ പാലിച്ചാണ് ഇറക്കുമതി പൂർത്തിയാക്കിയതെന്നും റിപ്പോർട്ടുകൾ വ്യക്തമാക്കുന്നു.
ടൂർണമെന്റിനിടെ വിവിധ നഗരങ്ങളിലേക്ക് തുടർച്ചയായി യാത്ര ചെയ്യുകയും ചുരുങ്ങിയ ഇടവേളകളിൽ മത്സരങ്ങൾ കളിക്കുകയും ചെയ്യുന്നത് കളിക്കാർക്ക് വലിയ ശാരീരിക വെല്ലുവിളിയാണ്. അതിനാൽ, ശരിയായ പോഷകാഹാരത്തിലൂടെ അവരുടെ വീണ്ടെടുപ്പും മത്സരസജ്ജതയും ഉറപ്പാക്കുകയാണ് സപ്പോർട്ട് സ്റ്റാഫിന്റെ ലക്ഷ്യം.
അതേസമയം, അർജന്റീനൻ താരങ്ങൾ പരിശീലനത്തിന്റെയും മത്സരങ്ങളുടെയും ഇടവേളകളിൽ ഒരുമിച്ച് ബാർബിക്യൂ സംഘടിപ്പിക്കുന്ന ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്. ഇത്തരം കൂട്ടായ്മകൾ ടീമിനുള്ളിലെ ഐക്യവും സമ്മർദ്ദം കുറയ്ക്കുന്നതിലും സഹായിക്കുന്നുവെന്നാണ് വിലയിരുത്തൽ. മൈതാനത്തിന് പുറത്തുള്ള ഇത്തരം ഒരുക്കങ്ങളും കിരീടം നിലനിർത്താനുള്ള അർജന്റീനയുടെ ശ്രമങ്ങൾക്ക് കരുത്താകുമെന്ന പ്രതീക്ഷയിലാണ് ആരാധകർ.
