അതിർത്തികളിൽ നിലവിലുള്ള ശാന്തത താൽക്കാലികം മാത്രമാണെന്നും ഏത് സാഹചര്യത്തെയും നേരിടാൻ രാജ്യം സജ്ജമാണെന്നും ഇന്ത്യൻ കരസേനാ മേധാവി ജനറൽ ഉപേന്ദ്ര ദ്വിവേദി. മൂന്ന് സായുധ സേനകളും സംയുക്തമായി നടത്തുന്ന ‘ഓപ്പറേഷൻ സിന്ദൂർ 2.0’ പദ്ധതിക്ക് പൂർണ്ണ സജ്ജമാണെന്ന് ശനിയാഴ്ച നടത്തിയ നിർണ്ണായക പ്രസ്താവനയിൽ അദ്ദേഹം വ്യക്തമാക്കി.
ശത്രുരാജ്യങ്ങളുടെ ഓരോ നീക്കങ്ങളും ഇന്ത്യൻ സൈന്യം നിരന്തരം നിരീക്ഷിച്ചുവരികയാണെന്നും അദ്ദേഹം കൂട്ടിച്ചേർത്തു. ആധുനിക യുദ്ധതന്ത്രങ്ങളുടെ ഭാഗമായി കര, നാവിക, വ്യോമ സേനകൾ തമ്മിലുള്ള പരസ്പര ഏകോപനം ശക്തമാക്കി വരികയാണെന്ന് ജനറൽ ദ്വിവേദി പറഞ്ഞു.
സാങ്കേതികവിദ്യയുടെ വളർച്ചയോടെ യുദ്ധക്കളത്തിലെ ഓരോ നീക്കങ്ങളും ഇപ്പോൾ വ്യക്തമായി നിരീക്ഷിക്കാൻ സാധിക്കും. അതുകൊണ്ടുതന്നെ അതിർത്തിയിലെ സൈനികർക്കൊപ്പം തന്നെ രാജ്യത്തെ സാധാരണക്കാരായ ജനങ്ങളുടെ സംരക്ഷണ ഉറപ്പാക്കുന്നതിനാണ് പ്രതിരോധ മന്ത്രാലയം പ്രഥമ പരിഗണന നൽകുന്നത്. ഇന്ത്യൻ പ്രതിരോധ സേനകൾ 24 മണിക്കൂറും അതീവ ജാഗ്രതയിലാണെന്ന് അദ്ദേഹം വിശദീകരിച്ചു.
ശത്രുരാജ്യങ്ങൾക്കെതിരെയുള്ള വിവരയുദ്ധത്തിൽ വിജയിക്കാൻ രാജ്യത്തെ ജനങ്ങളുടെ പിന്തുണ വളരെ പ്രധാനമാണെന്ന് ജനറൽ ഉപേന്ദ്ര ദ്വിവേദി ഓർമ്മിപ്പിച്ചു. സോഷ്യൽ മീഡിയ വഴി പ്രചരിക്കുന്ന വ്യാജമായ വിവരങ്ങളിൽ വീണുപോകാതെ, സൈന്യവും സർക്കാരും പുറത്തുവിടുന്ന ഔദ്യോഗിക വിവരങ്ങൾ മാത്രം ജനങ്ങൾ വിശ്വസിക്കണമെന്ന് അദ്ദേഹം ആഹ്വാനം ചെയ്തു.
ആധുനിക കാലത്തെ യുദ്ധങ്ങൾ അതിർത്തിയിൽ മാത്രമല്ല നടക്കുന്നത്. രാജ്യം മുഴുവൻ ഒന്നിച്ച് ഒരേ മനസ്സോടെ നിന്നാൽ മാത്രമേ ശത്രുവിന്റെ ഇത്തരം തന്ത്രങ്ങൾക്കെതിരെ പൂർണ്ണമായ വിജയം സാധ്യമാകൂ എന്നും കരസേനാ മേധാവി വ്യക്തമാക്കി.
