ഇന്ത്യൻ കറൻസി ഉപയോഗവുമായി ബന്ധപ്പെട്ട് നിർണായക ഇളവ് പ്രഖ്യാപിച്ച് നേപ്പാൾ സർക്കാർ. ഏകദേശം പത്ത് വർഷമായി നിലവിലുണ്ടായിരുന്ന നിയന്ത്രണങ്ങളിൽ മാറ്റം വരുത്തി, ₹200, ₹500 ഇന്ത്യൻ നോട്ടുകളുടെ ഇറക്കുമതിക്കും കയറ്റുമതിക്കും അനുമതി നൽകി. ഇന്ത്യക്കും നേപ്പാളിനും ഇടയിൽ യാത്ര ചെയ്യുന്നവർക്ക് ₹25,000 വരെയുള്ള ഇന്ത്യൻ കറൻസി കൈവശം വയ്ക്കാമെന്ന് നേപ്പാൾ രാഷ്ട്ര ബാങ്ക് (എൻആർബി) വ്യക്തമാക്കി.
2016ലെ ഇന്ത്യയുടെ നോട്ട് നിരോധനത്തിന് പിന്നാലെ ഏർപ്പെടുത്തിയ നിയന്ത്രണങ്ങൾക്കാണ് പുതിയ തീരുമാനത്തോടെ ഇളവ് ലഭിച്ചിരിക്കുന്നത്. 2016 നവംബർ 9ന് ശേഷം അച്ചടിച്ച പുതിയ ₹200, ₹500 നോട്ടുകൾക്കാണ് അനുമതി ബാധകമാകുക. അതേസമയം, പഴയ ₹500, ₹1,000 നോട്ടുകൾക്ക് ഏർപ്പെടുത്തിയ നിരോധനം തുടരുമെന്നും എൻആർബി വ്യക്തമാക്കി.
ഫെബ്രുവരി 11ന് നേപ്പാൾ ഗസറ്റിൽ ഈ തീരുമാനം പ്രസിദ്ധീകരിച്ചിരുന്നുവെങ്കിലും, നടപ്പാക്കലുമായി ബന്ധപ്പെട്ട വ്യക്തത വരുത്തുന്നതിനായാണ് കേന്ദ്ര ബാങ്ക് വീണ്ടും വിശദീകരണം നൽകിയത്.
നേപ്പാൾ രാഷ്ട്ര ബാങ്ക് വക്താവ് ഗുരു പ്രസാദ് പൗഡൽ പറയുന്നതനുസരിച്ച്, നേപ്പാൾ പൗരന്മാർക്ക് ഇന്ത്യയിൽ നിന്ന് മാത്രമേ ഈ കറൻസി രാജ്യത്തേക്ക് കൊണ്ടുവരാൻ കഴിയൂ. ഇന്ത്യ ഒഴികെയുള്ള മറ്റ് രാജ്യങ്ങളിലേക്ക് നേപ്പാളിൽ നിന്ന് ഇന്ത്യൻ കറൻസി കൊണ്ടുപോകാൻ അനുമതിയില്ല.
പുതിയ തീരുമാനം ഇന്ത്യ-നേപ്പാൾ വ്യാപാര, ടൂറിസം, ജന-ജന ബന്ധങ്ങൾക്ക് കൂടുതൽ കരുത്തേകുമെന്നാണ് വിലയിരുത്തൽ. പ്രത്യേകിച്ച് അതിർത്തി പ്രദേശങ്ങളിലെ വ്യാപാരികൾക്കും ഇന്ത്യൻ വിനോദസഞ്ചാരികൾക്കും ഇത് വലിയ ആശ്വാസമാകും.
ഇന്ത്യ നേപ്പാളിന്റെ ഏറ്റവും വലിയ വ്യാപാര പങ്കാളിയാണ്. നോട്ട് നിരോധനത്തിന് ശേഷം ₹100-ഉം അതിൽ താഴെയുള്ള നോട്ടുകളും മാത്രമാണ് അനുവദിച്ചിരുന്നത്. ഇത് യാത്രക്കാരെയും ചെറുകിട വ്യാപാരികളെയും ബുദ്ധിമുട്ടിലാക്കിയിരുന്നു. ഇപ്പോൾ ₹25,000 എന്ന ആകെ പരിധി തുടരുന്നുണ്ടെങ്കിലും, ഉയർന്ന മൂല്യമുള്ള നോട്ടുകൾ അനുവദിച്ചതോടെ അതിർത്തി മേഖലയിലെ പണമിടപാടുകൾ കൂടുതൽ എളുപ്പമാകുമെന്നാണ് പ്രതീക്ഷ.
അതേസമയം, മറ്റ് വിദേശ കറൻസികളുടെ കാര്യത്തിൽ നിലവിലുള്ള നിയമങ്ങൾ തുടരും. പ്രത്യേക അനുമതിയില്ലാതെ 5,000 ഡോളർ വരെ രാജ്യത്തേക്ക് കൊണ്ടുവരാൻ അനുവദിക്കുന്ന വ്യവസ്ഥയിൽ മാറ്റമില്ലെന്നും അധികൃതർ അറിയിച്ചു.
