തിരഞ്ഞെടുപ്പ് പ്രചരണത്തിനിടെ എതിരാളികൾ നേരും നെറിയും ഉപേക്ഷിച്ച് തെറ്റായ പ്രചാരണങ്ങൾ നടത്തുകയാണെന്ന് മുഖ്യമന്ത്രി പിണറായി വിജയൻ ആരോപിച്ചു. എൽഡിഎഫിനെ നേരായ രീതിയിൽ എതിർക്കാൻ പ്രയാസമുള്ളതിനാലാണ് വസ്തുതകൾ വക്രീകരിച്ച് അവതരിപ്പിക്കുന്നതെന്നും അദ്ദേഹം പറഞ്ഞു. ധർമ്മടത്തിൽ നടന്ന എൽഡിഎഫ് തിരഞ്ഞെടുപ്പ് കൺവെൻഷൻ ഉദ്ഘാടനം ചെയ്ത് സംസാരിക്കുകയായിരുന്നു മുഖ്യമന്ത്രി.
നുണകൾ പരസ്യമായി അല്ല, വീടുകളിലെത്തി ആളുകളെ തെറ്റിദ്ധരിപ്പിക്കുന്ന രീതിയിലാണ് പ്രചരിപ്പിക്കുന്നതെന്ന് അദ്ദേഹം ആരോപിച്ചു. ഗീബൽസിനെയും കടത്തി വെട്ടുന്ന രീതിയിലാണ് രാഷ്ട്രീയ എതിരാളികൾ പ്രവർത്തിക്കുന്നതെന്നും, യഥാർത്ഥ വസ്തുതകൾ ജനങ്ങളിലെത്തിക്കുന്നതിലൂടെ മാത്രമേ ഈ പ്രചാരണങ്ങളെ ചെറുക്കാനാകൂവെന്നും മുഖ്യമന്ത്രി പറഞ്ഞു.
എസ്ഐആർ വിഷയത്തിൽ ന്യൂനപക്ഷങ്ങൾക്ക് എതിരായ ആശങ്കകൾ ഉണ്ടായിരുന്നുവെങ്കിലും, എൽഡിഎഫ് സർക്കാർ കൃത്യമായ സമീപനമാണ് സ്വീകരിച്ചതെന്ന് അദ്ദേഹം വ്യക്തമാക്കി. എന്നിരുന്നാലും, എസ്ഐആർ കേരളത്തിൽ കൊണ്ടുവന്നത് എൽഡിഎഫ് സർക്കാരാണെന്നും, ന്യൂനപക്ഷങ്ങളെ പുറത്താക്കാനാണെന്നും തെറ്റായ പ്രചാരണങ്ങൾ ചിലർ വീടുകളിൽ എത്തി നടത്തിയതായി അദ്ദേഹം ആരോപിച്ചു.
പൗരത്വ ഭേദഗതി നിയമത്തെ ശക്തമായി എതിർത്തത് ഇടതുപക്ഷമാണെന്നും, അത് കേരളത്തിൽ നടപ്പാക്കില്ലെന്ന് പ്രഖ്യാപിച്ച ഏക സംസ്ഥാനം കേരളമാണെന്നും മുഖ്യമന്ത്രി ഓർമ്മിപ്പിച്ചു. ഇത്തരത്തിൽ വ്യക്തമായ നിലപാട് സ്വീകരിച്ച സർക്കാരിനെ കുറ്റപ്പെടുത്തുന്നത് ശരിയല്ലെന്നും, ചിലർ സങ്കുചിത താൽപ്പര്യങ്ങൾക്കായി തെറ്റായ പ്രചാരണങ്ങൾ നടത്തുന്നുവെന്നും അദ്ദേഹം കൂട്ടിച്ചേർത്തു.
