നിപ പ്രതിരോധ നടപടികളുമായി ബന്ധപ്പെട്ട് സംസ്ഥാന സർക്കാരിനെയും ആരോഗ്യമന്ത്രിയെയും രൂക്ഷമായി വിമർശിച്ച് പ്രതിപക്ഷ നേതാവ് പിണറായി വിജയൻ. അതീവ ഗൗരവമുള്ള വിഷയത്തോട് ആരോഗ്യമന്ത്രി അത്യന്തം ലാഘവത്തോടെയാണ് പ്രതികരിക്കുന്നതെന്ന് അദ്ദേഹം നിയമസഭയിൽ ആരോപിച്ചു.
നിപ രോഗബാധ മറ്റൊരാളിലേക്കും പകരാതിരുന്നത് ആശ്വാസകരമായ കാര്യമാണെങ്കിലും, ആ ഘട്ടത്തിൽ സ്വീകരിച്ച നടപടികളും ഉണ്ടായ വീഴ്ചകളും ഗൗരവമായി പരിശോധിക്കേണ്ടതുണ്ടെന്ന് പിണറായി വിജയൻ പറഞ്ഞു. രോഗബാധയെ തുടർന്ന് കൂടുതൽ മരണങ്ങൾ സംഭവിക്കാതിരുന്നതും നല്ല കാര്യമാണെന്നും അദ്ദേഹം കൂട്ടിച്ചേർത്തു. എന്നാൽ പ്രതിരോധ പ്രവർത്തനങ്ങളിൽ ഉണ്ടായ കാലതാമസം ആശങ്കാജനകമാണെന്നും അദ്ദേഹം ചൂണ്ടിക്കാട്ടി.
മുൻകാലങ്ങളിൽ നിപ റിപ്പോർട്ട് ചെയ്തപ്പോൾ ആരോഗ്യവകുപ്പ് അതിവേഗം ഇടപെട്ടിരുന്നുവെന്ന് അദ്ദേഹം ഓർമ്മിപ്പിച്ചു. ആരോഗ്യമന്ത്രി നേരിട്ട് സ്ഥലത്തെത്തി വിവിധ വകുപ്പുകളുടെ പ്രവർത്തനങ്ങൾ ഏകോപിപ്പിക്കുകയും പ്രതിരോധ നടപടികൾക്ക് നേതൃത്വം നൽകുകയും ചെയ്തിരുന്നു. എന്നാൽ നിലവിലെ സാഹചര്യത്തിൽ നിപ സ്ഥിരീകരിച്ച മേഖലയിലേക്ക് എത്താൻ ആരോഗ്യമന്ത്രി എത്ര ദിവസം എടുത്തുവെന്ന് അദ്ദേഹം ചോദിച്ചു.
ആരോഗ്യമന്ത്രിയുടെ മുൻകാല ‘എരണം കെട്ടവർ’ പരാമർശത്തെയും പിണറായി വിജയൻ പരാമർശിച്ചു. അന്ന് പ്രതിരോധ പ്രവർത്തനങ്ങൾ ഒരാളുടേതല്ല, എല്ലാവരുടെയും കൂട്ടായ പരിശ്രമത്തിന്റെ ഫലമായിരുന്നുവെന്നും അദ്ദേഹം പറഞ്ഞു. പ്രതിസന്ധി ഘട്ടങ്ങളിൽ എല്ലാ സംവിധാനങ്ങളെയും ഒന്നിച്ച് ചേർത്ത് പ്രവർത്തിപ്പിക്കുകയാണ് പ്രധാനമെന്നും അദ്ദേഹം അഭിപ്രായപ്പെട്ടു.
കാലവർഷത്തിന് മുൻപ് നടത്തേണ്ട ശുചീകരണ-പ്രതിരോധ പ്രവർത്തനങ്ങൾ കൃത്യമായി നടപ്പാക്കുന്നതിൽ സർക്കാർ പരാജയപ്പെട്ടോയെന്ന ചോദ്യവും അദ്ദേഹം ഉയർത്തി. സാധാരണ സാഹചര്യങ്ങളിൽ സ്വീകരിക്കേണ്ട മുൻകരുതൽ നടപടികൾ പോലും സമയബന്ധിതമായി നടന്നില്ലെന്നും അദ്ദേഹം ആരോപിച്ചു.
നിപ ഉൾപ്പെടെയുള്ള പകർച്ചവ്യാധികളെ നേരിടുന്നതിൽ സർക്കാരിന്റെ സമീപനം കൂടുതൽ ജാഗ്രതയും ഏകോപനവും ആവശ്യപ്പെടുന്നതാണെന്ന് പ്രതിപക്ഷം ആവർത്തിക്കുമ്പോൾ, ആരോഗ്യരംഗത്തെ നിലവിലെ സാഹചര്യം നിയമസഭയിൽ വീണ്ടും ശക്തമായ രാഷ്ട്രീയ ചർച്ചകൾക്ക് വഴിവെച്ചിരിക്കുകയാണ്.
