പാലക്കാട് സിപിഐഎം–ബിജെപി രഹസ്യ ധാരണയെന്ന കെ.സി. വേണുഗോപാൽ ഉയർത്തിയ ആരോപണത്തിന് മറുപടിയുമായി തോമസ് ഐസക് രംഗത്തെത്തി. പാലക്കാട് ‘ഡീൽ’ കോൺഗ്രസും ബിജെപിയും തമ്മിലാണെന്നാണ് അദ്ദേഹത്തിന്റെ ആരോപണം. കോ-ലീ-ബി സഖ്യം പഴക്കമേറിയതാണെന്നും, “കള്ളൻമാർ മുൻപേ ഓടി കള്ളൻ കള്ളൻ എന്ന് വിളിക്കുന്നു” എന്നായിരുന്നു ഐസക്കിന്റെ വിമർശനം.
പാലക്കാട് യുഡിഎഫിനെ പിന്തുണയ്ക്കണമെന്ന ആവശ്യം നിരസിച്ച ഐസക്, “അതിനായി വേറെ പണി നോക്കുക” എന്നായിരുന്നു പ്രതികരണം. “കോമാളി വേഷം കെട്ടുന്ന നടന്മാരെ സ്ഥാനാർഥിയാക്കിയിട്ട് വോട്ട് കിട്ടുന്നില്ലെന്ന് പറയുന്നതിന് അർത്ഥമുണ്ടോ?” എന്നും അദ്ദേഹം ചോദിച്ചു. വൈപ്പിൻ മണ്ഡലത്തിലെ എൽഡിഎഫ് സ്ഥാനാർഥി എം.ബി. ഷൈനിയുടെ കൺവെൻഷനിൽ സംസാരിക്കുകയായിരുന്നു അദ്ദേഹം.
കേരളത്തിൽ ബിജെപിയുമായി യഥാർത്ഥത്തിൽ സഖ്യം ഉണ്ടാക്കിയിരിക്കുന്നത് ആരാണെന്നും ഐസക് ചോദിച്ചു. ജനങ്ങൾ അംഗീകരിക്കുന്ന സ്ഥാനാർഥികളെ യുഡിഎഫ് നിർത്തണമെന്ന് അദ്ദേഹം ആവശ്യപ്പെട്ടു.
അതേസമയം, ജി. സുധാകരൻ സംബന്ധിച്ച വിവാദത്തിലും അദ്ദേഹം പ്രതികരിച്ചു. “സ്ഥാനമാനങ്ങളോടുള്ള ആർത്തിയാണ് സുധാകരന്; അത് കാണുമ്പോൾ സഹതാപം തോന്നുന്നു. 60 വർഷത്തെ രാഷ്ട്രീയ ജീവിതം അദ്ദേഹം കളഞ്ഞു” എന്നും ഐസക് പറഞ്ഞു.
