ഇന്ത്യൻ ഷൂട്ടിങ് രംഗത്തെ ഇതിഹാസതാരവും ഏഷ്യൻ ഗെയിംസ് സ്വർണ മെഡൽ ജേതാവും പ്രമുഖ പരിശീലകനുമായ ജസ്പാൽ റാണ 49-ാം വയസ്സിൽ അന്തരിച്ചു. വെള്ളിയാഴ്ച രാവിലെയായിരുന്നു അന്ത്യം. ജർമനിയിലെ മ്യൂണിക്കിൽ നടന്ന ഐഎസ്എസ്എഫ് ലോകകപ്പിൽ പങ്കെടുത്ത് ഇന്ത്യയിലേക്ക് മടങ്ങുന്നതിനിടെ വ്യാഴാഴ്ച രാത്രി അദ്ദേഹത്തിന് ശാരീരിക അസ്വസ്ഥത അനുഭവപ്പെട്ടു.
ന്യൂഡൽഹിയിൽ വിമാനമിറങ്ങിയ ഉടൻ തന്നെ സാകേതിലെ മാക്സ് ആശുപത്രിയിൽ പ്രവേശിപ്പിച്ച റാണയ്ക്ക് ഹൃദയസംബന്ധമായ പ്രശ്നത്തെ തുടർന്ന് അടിയന്തര ആൻജിയോപ്ലാസ്റ്റി നടത്തി സ്റ്റെന്റ് സ്ഥാപിച്ചെങ്കിലും ജീവൻ രക്ഷിക്കാനായില്ല. നാഷണൽ റൈഫിൾ അസോസിയേഷൻ ഓഫ് ഇന്ത്യ പ്രസിഡന്റ് കലികേഷ് നാരായൺ സിങ് ഡിയോയാണ് മരണവാർത്ത സ്ഥിരീകരിച്ചത്.
മൂന്ന് പതിറ്റാണ്ടിലേറെയായി അത്ലറ്റായും പരിശീലകനായും ഇന്ത്യൻ ഷൂട്ടിങ് രംഗത്ത് നിർണായക സാന്നിധ്യമായിരുന്നു ജസ്പാൽ റാണ. രാജ്യത്തിന് നിരവധി അന്താരാഷ്ട്ര മെഡലുകൾ സമ്മാനിച്ച അദ്ദേഹം ഇന്ത്യൻ ഷൂട്ടിങിനെ ജനകീയമാക്കുന്നതിലും വലിയ പങ്കുവഹിച്ചു. കായികരംഗത്തെ സംഭാവനകൾക്ക് രാജ്യം അദ്ദേഹത്തെ അർജുന അവാർഡും പദ്മശ്രീയും നൽകി ആദരിച്ചിരുന്നു. 2020-ൽ മികച്ച പരിശീലകനുള്ള ദ്രോണാചാര്യ പുരസ്കാരവും ലഭിച്ചു.
പിസ്റ്റൾ വിഭാഗത്തിലെ മികവിലൂടെ അന്താരാഷ്ട്ര ശ്രദ്ധ നേടിയ റാണ, 2006 ദോഹ ഏഷ്യൻ ഗെയിംസിൽ മൂന്ന് സ്വർണമെഡലുകൾ സ്വന്തമാക്കി. 25 മീറ്റർ സെന്റർ ഫയർ പിസ്റ്റൾ ഇനത്തിൽ 590 പോയിന്റ് നേടി ലോക റെക്കോർഡിനൊപ്പമെത്തിയതും അദ്ദേഹത്തിന്റെ കരിയറിലെ ശ്രദ്ധേയ നേട്ടങ്ങളിലൊന്നാണ്. ഏഷ്യൻ ഗെയിംസിൽ നാല് സ്വർണം, രണ്ട് വെള്ളി, രണ്ട് വെങ്കലം മെഡലുകളും കോമൺവെൽത്ത് ഗെയിംസിൽ ഒമ്പത് സ്വർണം, നാല് വെള്ളി, രണ്ട് വെങ്കലം മെഡലുകളും അദ്ദേഹം നേടി.
മത്സര രംഗത്ത് നിന്ന് വിരമിച്ച ശേഷം 2012 മുതൽ പരിശീലകനെന്ന നിലയിൽ ഇന്ത്യൻ ഷൂട്ടിങിന് പുതിയ തലമുറയെ വാർത്തെടുക്കുന്നതിൽ അദ്ദേഹം ശ്രദ്ധ കേന്ദ്രീകരിച്ചു. ജൂനിയർ പിസ്റ്റൾ പ്രോഗ്രാമിന്റെ ചുമതലയേറ്റെടുത്ത അദ്ദേഹം നിരവധി പ്രതിഭകളെ അന്താരാഷ്ട്ര നിലവാരത്തിലേക്ക് ഉയർത്തി.
ഒളിമ്പ്യൻ മനു ഭാക്കറുമായുള്ള അദ്ദേഹത്തിന്റെ പരിശീലക ബന്ധമാണ് കോച്ചിങ് ജീവിതത്തിലെ ഏറ്റവും ശ്രദ്ധേയമായ അധ്യായം. 2024 പാരിസ് ഒളിമ്പിക്സിൽ മനു ഭാക്കർ രണ്ട് വെങ്കല മെഡലുകൾ നേടുന്നതിൽ റാണയുടെ പരിശീലന മികവ് നിർണായക പങ്കുവഹിച്ചു. സൗരഭ് ചൗധരി, അനീഷ് ഭൻവാല, ചിങ്കി യാദവ് തുടങ്ങി നിരവധി പ്രമുഖ ഷൂട്ടർമാരും അദ്ദേഹത്തിന്റെ ശിക്ഷണത്തിലൂടെ വളർന്നവരാണ്.
2025 ഫെബ്രുവരിയിൽ നാഷണൽ റൈഫിൾ അസോസിയേഷൻ ഓഫ് ഇന്ത്യ 25 മീറ്റർ പിസ്റ്റൾ വിഭാഗത്തിന്റെ ഹൈ-പെർഫോമൻസ് കോച്ചായി അദ്ദേഹത്തെ നിയമിച്ചിരുന്നു. മരണം വരെ ആ ചുമതലയിൽ അദ്ദേഹം സജീവമായി തുടർന്നു.
ജസ്പാൽ റാണയുടെ വിയോഗം ഇന്ത്യൻ കായികരംഗത്തിനും പ്രത്യേകിച്ച് ഷൂട്ടിങ് സമൂഹത്തിനും തീരാനഷ്ടമായി വിലയിരുത്തപ്പെടുന്നു.
