ട്വന്റി-20 ലോകകപ്പിൽ പാകിസ്താനെതിരായ നിർണായക മത്സരത്തിനായി തയ്യാറെടുക്കുന്ന ഇന്ത്യൻ ടീമിനെ കുറിച്ച് ആശങ്ക പങ്കുവച്ച് മുൻ ഇന്ത്യൻ താരം സുനിൽ ഗവാസ്കർ. നമീബിയക്കെതിരായ കഴിഞ്ഞ മത്സരത്തിൽ വയറുവേദനയെ തുടർന്ന് അഭിഷേക് ശർമ്മയ്ക്ക് പകരം സഞ്ജു സാംസൺ ഓപ്പണറായി ഇറങ്ങിയിരുന്നു. എട്ട് പന്തിൽ 22 റൺസ് നേടിയെങ്കിലും മികച്ച തുടക്കം വലിയ സ്കോറാക്കാൻ സാധിക്കാതെ താരം പുറത്തായി.
മികച്ച തുടക്കം ലഭിച്ചിട്ടും മോശം ഷോട്ട് കളിച്ച് വിക്കറ്റ് നഷ്ടപ്പെടുത്തിയ രീതിയാണ് ആശങ്കയുണ്ടാക്കുന്നതെന്ന് ഗവാസ്കർ പറഞ്ഞു. മുമ്പും സമാന സാഹചര്യങ്ങളിൽ സഞ്ജു പുറത്തായിട്ടുണ്ടെന്ന് അദ്ദേഹം ചൂണ്ടിക്കാട്ടി.
“ഞായറാഴ്ച നടക്കുന്ന പാകിസ്താൻ മത്സരത്തിൽ അഭിഷേക് ശർമ്മ ഫിറ്റ് അല്ലെങ്കിൽ സഞ്ജുവിന് തന്നെ കളിക്കേണ്ടി വരും. കഴിഞ്ഞ കുറച്ച് കാലമായി അദ്ദേഹം സ്ഥിരതയാർന്ന പ്രകടനം കാഴ്ചവെച്ചിട്ടില്ല. അത് ടീം മാനേജ്മെന്റിന് ആശങ്കയുണ്ടാക്കുന്ന കാര്യമാണ്. ന്യൂസിലാൻഡിനെതിരെയും ഈ മത്സരത്തിലും നേടാതെ പോയ റൺസുകൾ അദ്ദേഹം നിർണായക മത്സരത്തിനായി മാറ്റിവെച്ചിട്ടുണ്ടെന്ന് പ്രതീക്ഷിക്കാം,” ഗവാസ്കർ പറഞ്ഞു.
അതേസമയം, ബാറ്റിംഗിന് അനുകൂലമല്ലാത്ത പിച്ചിൽ സഞ്ജുവും ഇഷാൻ കിഷൻയും മികച്ച തുടക്കമാണ് നൽകിയതെന്നും ഗവാസ്കർ കൂട്ടിച്ചേർത്തു.
