വരാനിരിക്കുന്ന നിയമസഭാ തെരഞ്ഞെടുപ്പിന് ശേഷം പുതുച്ചേരിയിൽ കോൺഗ്രസ് അധികാരത്തിൽ വന്നാൽ കേന്ദ്രഭരണ പ്രദേശത്തിന് സംസ്ഥാന പദവി നൽകുമെന്ന് കോൺഗ്രസ് എംപി രാഹുൽ ഗാന്ധി പറഞ്ഞു. ലോക്സഭയിലെ പ്രതിപക്ഷ നേതാവായ അദ്ദേഹം, പുതുച്ചേരി ഇപ്പോൾ ഡൽഹിയിൽ നിന്ന് നിയന്ത്രിക്കപ്പെടുന്ന കേന്ദ്രഭരണ സംവിധാനത്തിലാണ് പ്രവർത്തിക്കുന്നതെന്നും ആരോപിച്ചു.
ലോസ്പേട്ടിൽ നടന്ന പൊതുയോഗത്തിൽ സംസാരിക്കവെ, ബിജെപി “റിമോട്ട് കൺട്രോൾ” വഴി പുതുച്ചേരി ഭരിക്കുകയാണെന്നും പ്രാദേശിക നേതാക്കളെ അവഗണിക്കുന്നുവെന്നും അദ്ദേഹം വിമർശിച്ചു. കോൺഗ്രസ് വീണ്ടും അധികാരത്തിലെത്തിയാൽ ആറുമാസത്തിനുള്ളിൽ തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പ് നടത്തുമെന്നും അദ്ദേഹം വാഗ്ദാനം ചെയ്തു.
തൊഴിലില്ലാത്ത യുവാക്കൾക്ക് പ്രതിമാസം 2,000 രൂപ ധനസഹായം നൽകുകയും, പൊതു-സ്വകാര്യ മേഖലകളിൽ 30,000 തൊഴിലവസരങ്ങൾ സൃഷ്ടിക്കുകയും ചെയ്യുമെന്ന് രാഹുൽ ഗാന്ധി പറഞ്ഞു. സ്ത്രീകൾക്ക് സൗജന്യ ബസ് യാത്രയും ഉറപ്പുനൽകി.
സർക്കാർ ജോലികളിലെ പ്രായപരിധി 40 വയസ്സ് വരെ ഉയർത്തുമെന്നും, ഓരോ കുടുംബത്തിനും 20 ലക്ഷം രൂപയുടെ ആരോഗ്യ ഇൻഷുറൻസ് നൽകുമെന്നും അദ്ദേഹം വ്യക്തമാക്കി.
പുതുച്ചേരിയിലെ വ്യാവസായിക-തുണിത്തര മേഖലകൾ തളർന്നിരിക്കുകയാണെന്നും 100 ഫാക്ടറികൾ അടച്ചുപൂട്ടിയെന്നും രാഹുൽ ഗാന്ധി ആരോപിച്ചു. വ്യാജ മരുന്ന് നിർമ്മാണ റാക്കറ്റ് പ്രവർത്തിക്കുന്നുവെന്നും, ഇതിനെതിരെ യാതൊരു നടപടിയും സ്വീകരിക്കുന്നില്ലെന്നും അദ്ദേഹം വിമർശിച്ചു.
കരാറുകളിലെ അഴിമതി ആരോപിച്ചുകൊണ്ട്, “30 ശതമാനം കമ്മീഷൻ” പ്രക്രിയ സർക്കാർ തലത്തിൽ നടക്കുന്നതായി അദ്ദേഹം ആരോപിച്ചു. സ്മാർട്ട് സിറ്റി പദ്ധതികൾ, റോഡുകൾ, സ്കൂളുകൾ എന്നിവയുമായി ബന്ധപ്പെട്ടും അഴിമതി നടക്കുന്നതായും അദ്ദേഹം പറഞ്ഞു.
അതേസമയം, 30 അംഗ പുതുച്ചേരി നിയമസഭയിലേക്കുള്ള തിരഞ്ഞെടുപ്പ് ഏപ്രിൽ 9ന് ഒറ്റ ഘട്ടമായി നടക്കും. വോട്ടെണ്ണൽ മെയ് 4ന് നടക്കുമെന്ന് തിരഞ്ഞെടുപ്പ് കമ്മീഷൻ അറിയിച്ചു.
