തെക്കൻ ലെബനനിലെ ഏഴ് പട്ടണങ്ങൾ കൂടി നിർബന്ധിതമായി ഒഴിപ്പിക്കണമെന്ന് ഇസ്രായേൽ ഉത്തരവിട്ടതിന് പിന്നാലെ പ്രദേശത്ത് സംഘർഷം ശക്തമായി. ഹിസ്ബുള്ള നടത്തിയ ഡ്രോൺ ആക്രമണത്തിൽ ഒരു ഇസ്രായേൽ പ്രതിരോധ സേന (ഐഡിഎഫ്) സൈനികൻ കൊല്ലപ്പെട്ടു.
ലെബനൻ അതിർത്തിയിലെ തായ്ബെ പട്ടണത്തിൽ പ്രവർത്തിച്ചിരുന്ന ഇസ്രായേൽ സേനാ യൂണിറ്റിന് നേരെ ഞായറാഴ്ച നടന്ന ആക്രമണത്തിലാണ് 19 വയസ്സുള്ള സർജന്റ് ഇഡാൻ ഫൂക്സ് കൊല്ലപ്പെട്ടത്. സംഭവത്തിൽ ആറ് സൈനികർക്ക് പരിക്കേറ്റതായി ഐഡിഎഫ് അറിയിച്ചു. ഇതിൽ നാല് പേരുടെ നില ഗുരുതരമാണ്.
പരിക്കേറ്റ സൈനികരെ ആശുപത്രിയിലേക്ക് വ്യോമമാർഗം മാറ്റുന്നതിനായി ഹെലികോപ്റ്റർ എത്തിച്ചപ്പോൾ വീണ്ടും ഡ്രോൺ ആക്രമണം ഉണ്ടായതായും റിപ്പോർട്ടുണ്ട്. സോഷ്യൽ മീഡിയയിൽ പ്രചരിക്കുന്ന ദൃശ്യങ്ങൾ പ്രകാരം, സൈനികർക്കും ഹെലികോപ്റ്ററിനും സമീപമായി രണ്ട് ഡ്രോണുകൾ വിക്ഷേപിക്കപ്പെട്ടു.
ഇതിൽ ഒന്ന് പ്രതിരോധ സംവിധാനങ്ങൾ തടഞ്ഞുവെങ്കിലും മറ്റൊന്ന് സമീപത്ത് പൊട്ടിത്തെറിച്ചതായി ഐഡിഎഫ് സ്ഥിരീകരിച്ചു. എന്നാൽ കൂടുതൽ നാശനഷ്ടങ്ങൾ ഉണ്ടായിട്ടില്ലെന്നും സൈന്യം അറിയിച്ചു.
ഇസ്രായേലും ഹിസ്ബുള്ളയും തമ്മിലുള്ള അതിർത്തി സംഘർഷം വീണ്ടും കടുത്തതോടെ മേഖലയിലെ സുരക്ഷാ സ്ഥിതി കൂടുതൽ വഷളായിരിക്കുകയാണ്.
