ഇന്ത്യൻ മാമ്പഴ പ്രേമികൾക്കും കർഷകർക്കും കനത്ത തിരിച്ചടി നൽകിക്കൊണ്ട് ഇന്ത്യയിൽ നിന്നുള്ള മാമ്പഴങ്ങളുടെ ഇറക്കുമതി ജപ്പാൻ നിരോധിച്ചു. കഴിഞ്ഞ 20 വർഷത്തിനിടെ ആദ്യമായാണ് ഇന്ത്യൻ മാമ്പഴങ്ങൾക്ക് ജപ്പാൻ ഇത്തരമൊരു വിലക്കേർപ്പെടുത്തുന്നത്. മാമ്പഴങ്ങൾ കയറ്റുമതി ചെയ്യുന്നതിന് മുൻപുള്ള സംസ്കരണ സൗകര്യങ്ങളിലെ പോരായ്മകളും, പഴങ്ങൾ അണുവിമുക്തമാക്കുന്നതിൽ സംഭവിച്ച ഗുരുതരമായ വീഴ്ചകളുമാണ് നിരോധനത്തിലേക്ക് നയിച്ചതെന്നാണ് റിപ്പോർട്ടുകൾ.
ഈ പെട്ടെന്നുള്ള നിയന്ത്രണം ഇന്ത്യയുടെ ജനപ്രിയ മാമ്പഴ ഇനങ്ങളായ അൽഫോൻസോ, കേസർ, ലാംഗ്ര, ബംഗനപ്പള്ളി എന്നിവയുടെ കയറ്റുമതിയെ സാരമായി ബാധിച്ചിട്ടുണ്ട്. തൊട്ടുമുമ്പത്തെ സാമ്പത്തിക വർഷത്തിൽ (2025-26) ജപ്പാനിലേക്കുള്ള ഇന്ത്യയുടെ മാമ്പഴ കയറ്റുമതിയിൽ ഏറ്റവും വലിയ പങ്ക് വഹിച്ചിരുന്നത് ഗുജറാത്തിൽ നിന്നുള്ള കേസർ മാമ്പഴമായിരുന്നു. പുതിയ വിലക്ക് വന്നതോടെ വിപണി ലക്ഷ്യമിട്ട് വിളവെടുപ്പിന് കാത്തിരുന്ന കർഷകർ വലിയ പ്രതിസന്ധിയിലായിരിക്കുകയാണ്.
ഇന്ത്യൻ മാമ്പഴങ്ങൾക്ക് ജപ്പാൻ നിരോധനം ഏർപ്പെടുത്തുന്നത് ഇത് രണ്ടാം തവണയാണ്. 20 വർഷങ്ങൾക്ക് മുൻപ് സമാനമായ രീതിയിൽ ജപ്പാൻ നിയന്ത്രണം കൊണ്ടുവന്നിരുന്നു. അന്ന് മാമ്പഴങ്ങളിൽ കാണപ്പെടുന്ന ഒരിനം ഈച്ചകളുടെ സാന്നിധ്യമായിരുന്നു വിലക്കിന് കാരണം.
തുടർന്ന് രണ്ട് വർഷത്തോളം നീണ്ട ചർച്ചകൾക്കും പരിശോധനകൾക്കും ഒടുവിൽ, 2006 ജൂണിലാണ് ജപ്പാൻ ഔദ്യോഗികമായി ഈ നിരോധനം പിൻവലിച്ചത്. അന്നത്തെ വാണിജ്യ മന്ത്രി കമൽനാഥ് നടത്തിയ ശക്തമായ നയതന്ത്ര ഇടപെടലുകളെത്തുടർന്നായിരുന്നു കയറ്റുമതി പുനരാരംഭിക്കാൻ കഴിഞ്ഞത്.
അന്ന് ഏർപ്പെടുത്തിയ ധാരണപ്രകാരം ആന്ധ്രാപ്രദേശ്, ഗുജറാത്ത്, മഹാരാഷ്ട്ര, ഉത്തർപ്രദേശ്, പശ്ചിമ ബംഗാൾ എന്നീ സംസ്ഥാനങ്ങളിലെ അംഗീകൃത തോട്ടങ്ങളിൽ വിളവെടുക്കുന്ന അൽഫോൻസോ, ബംഗനപ്പള്ളി, കേസർ, ലാംഗ്ര, ചൗസ, മാലിക്ക എന്നീ ഇനങ്ങൾ ഇറക്കുമതി ചെയ്യാനാണ് ജപ്പാൻ അനുമതി നൽകിയിരുന്നത്. എന്നാൽ സുരക്ഷാ മാനദണ്ഡങ്ങളിലെ പുതിയ വീഴ്ചകൾ ചൂണ്ടിക്കാട്ടി ജപ്പാൻ വീണ്ടും കർശന നിലപാടിലേക്ക് മാറിയത് ഇന്ത്യൻ കാർഷിക മേഖലയ്ക്ക് വലിയ ആശങ്കയാണ് സൃഷ്ടിക്കുന്നത്.
