ഗൾഫ് രാജ്യങ്ങളെ സംരക്ഷിക്കാൻ വിന്യസിച്ചിരുന്ന അമേരിക്കയുടെ അത്യാധുനിക മിസൈൽ പ്രതിരോധ സംവിധാനങ്ങൾ ഇറാനിയൻ ആക്രമണങ്ങൾക്കുമുന്നിൽ പരാജയപ്പെട്ടെന്ന റിപ്പോർട്ടുകൾ ആശങ്ക ഉയർത്തുന്നു. ഏകദേശം 12 ലക്ഷം കോടി രൂപ ചെലവിൽ വികസിപ്പിച്ച പ്രതിരോധ സംവിധാനങ്ങൾക്കും വൻതോതിലുള്ള ആക്രമണങ്ങളെ ചെറുക്കാൻ സാധിച്ചില്ലെന്നാണ് വിലയിരുത്തൽ.
അമേരിക്കൻ പ്രതിരോധ കമ്പനി Lockheed Martin നിർമ്മിച്ച താട് (Terminal High Altitude Area Defense), Patriot PAC-3 പോലുള്ള സംവിധാനങ്ങൾ പോലും ആക്രമണം തടയുന്നതിൽ പര്യാപ്തമായില്ലെന്നതാണ് റിപ്പോർട്ടുകൾ സൂചിപ്പിക്കുന്നത്. സൗദി അറേബ്യ, ജോർദാൻ, യുണൈറ്റഡ് അറബ് എമിറേറ്റ്സ് എന്നിവിടങ്ങളിലെ പ്രധാന വ്യോമതാവളങ്ങളിൽ സ്ഥാപിച്ചിരുന്ന AN/TPY-2 റഡാറുകൾക്ക് കേടുപാടുകൾ സംഭവിച്ചതായി ഉപഗ്രഹ ചിത്രങ്ങൾ വ്യക്തമാക്കുന്നു. പ്രതിരോധ സംവിധാനത്തിന്റെ നിർണായക ഘടകമായ ഈ റഡാറുകൾ തകരുന്നത് മുഴുവൻ സംവിധാനത്തെയും ബാധിച്ചതായി വിലയിരുത്തുന്നു.
400-ലധികം ബാലിസ്റ്റിക് മിസൈലുകളും ആയിരത്തിലധികം ഡ്രോണുകളും ഒരേസമയം വിന്യസിച്ചുള്ള ഇറാന്റെ ആക്രമണം അതിവിപുലമായിരുന്നു. ഇത്രയും വലിയ തോതിലുള്ള ആക്രമണത്തെ നേരിടാൻ നിലവിലുള്ള യുഎസ് സംവിധാനങ്ങൾക്ക് കഴിഞ്ഞില്ലെന്നത് പ്രതിരോധ തന്ത്രത്തിലെ പരിമിതികളെ ചൂണ്ടിക്കാണിക്കുന്നു. കുറഞ്ഞ ചെലവിൽ നിർമ്മിക്കുന്ന ഇറാനിയൻ ഡ്രോണുകൾക്കെതിരെ കോടികൾ ചെലവുള്ള മിസൈലുകൾ ഉപയോഗിക്കേണ്ടി വരുന്നതും തന്ത്രപരമായ വെല്ലുവിളിയായി ഉയർന്നിട്ടുണ്ട്.
ഈ സാഹചര്യത്തിൽ സൗദി അറേബ്യ, യുണൈറ്റഡ് അറബ് എമിറേറ്റ്സ്, ഖത്തർ എന്നിവ ഉൾപ്പെടെയുള്ള ഗൾഫ് രാജ്യങ്ങളിൽ ആശങ്ക വർധിച്ചിരിക്കുകയാണ്. വൻതുക ചെലവഴിച്ചിട്ടും നിർണായക ഘട്ടങ്ങളിൽ പ്രതിരോധ സംവിധാനങ്ങൾ പ്രതീക്ഷിച്ച രീതിയിൽ പ്രവർത്തിക്കുന്നില്ലെന്ന വിമർശനവും ഉയരുന്നു.
