രണ്ട് തെരഞ്ഞെടുപ്പുകളിൽ വോട്ടിനായി പ്രതിപക്ഷ നേതാവ് വി.ഡി. സതീശൻ ആർഎസ്എസ് നേതാക്കളെ സമീപിച്ചിരുന്നുവെന്ന് ഹിന്ദു ഐക്യവേദി അധ്യക്ഷൻ ആർ.വി. ബാബു ആരോപിച്ചു. 2001ലെയും 2006ലെയും തെരഞ്ഞെടുപ്പുകളിലായിരുന്നു ഈ സമീപനമെന്നാണ് അദ്ദേഹം വ്യക്തമാക്കിയത്. 1996ലെ തെരഞ്ഞെടുപ്പിൽ മത്സരിച്ചപ്പോൾ സതീശൻ തോറ്റതായും അദ്ദേഹം ചൂണ്ടിക്കാട്ടി.
2001ൽ വിജയിക്കുക എന്ന ലക്ഷ്യത്തോടെയാണ് സതീശൻ ആർഎസ്എസ് നേതാക്കളെ കണ്ടതെന്ന് ബാബു പറഞ്ഞു. അന്നത്തെ സാഹചര്യത്തിൽ കോൺഗ്രസിന് ആർഎസ്എസിനോട് ഇന്നുള്ളത്ര വിരോധമുണ്ടായിരുന്നില്ലെന്നും അദ്ദേഹം കൂട്ടിച്ചേർത്തു. റിപ്പോർട്ടർ ടിവിയുടെ ‘ഡിബേറ്റ് വിത്ത് മാതു സജി’ പരിപാടിയിലായിരുന്നു അദ്ദേഹത്തിന്റെ പ്രതികരണം.
2006ൽ ഗോൾവാൾക്കറുടെ ജന്മശതാബ്ദിയോടനുബന്ധിച്ച് സംഘടിപ്പിച്ച പരിപാടിയിൽ സതീശൻ പങ്കെടുത്ത ചിത്രമാണ് മുഖ്യമന്ത്രി ഇന്ന് ഫേസ്ബുക്കിൽ പങ്കുവെച്ചതെന്നും ബാബു പറഞ്ഞു. മുമ്പ് ഈ ചിത്രവുമായി ബന്ധപ്പെട്ട് വിവാദം ഉയർന്നപ്പോൾ താൻ അത് സാമൂഹ്യമാധ്യമങ്ങളിൽ പങ്കുവെച്ചിരുന്നുവെന്നും അദ്ദേഹം വ്യക്തമാക്കി. അന്ന് അത്തരമൊരു പരിപാടിയിൽ പങ്കെടുത്തിട്ടില്ലെന്ന് പറഞ്ഞ് സതീശൻ ആരോപണം നിഷേധിച്ചിരുന്നുവെന്നും ബാബു പറഞ്ഞു.
2006ലെ ആ പരിപാടിയിൽ പങ്കെടുത്ത പലരും ഇന്നും ജീവിച്ചിരിക്കുന്നുവെന്നും പ്രമുഖ പത്രപ്രവർത്തകൻ പി. രാജൻ, പതിനാറ് വർഷത്തോളം ആർഎസ്എസ് പ്രചാരകനായിരുന്ന തന്റെ സഹോദരൻ ആർ.വി. ജയകുമാർ എന്നിവർ ഉൾപ്പെടെ നിരവധി പേർ പങ്കെടുത്തിരുന്നുവെന്നും അദ്ദേഹം പറഞ്ഞു. ഗോൾവാൾക്കറുടെ ജന്മശതാബ്ദിയോടനുബന്ധിച്ച് ‘മതഭീകരവാദവും മുന്നണി രാഷ്ട്രീയവും’ എന്ന വിഷയത്തിൽ സെമിനാറും സംഘടിപ്പിച്ചിരുന്നുവെന്നും ബാബു കൂട്ടിച്ചേർത്തു.
ചിത്രം വ്യാജമാണെന്ന് സതീശൻ പറയുന്നുവെങ്കിൽ എന്തുകൊണ്ട് നിയമനടപടി സ്വീകരിച്ചില്ലെന്നും ബാബു ചോദിച്ചു. താൻ സതീശനെ വെല്ലുവിളിച്ചിട്ടും അദ്ദേഹത്തിന്റെ ഭാഗത്ത് നിന്ന് യാതൊരു നടപടിയും ഉണ്ടായിട്ടില്ലെന്നും അദ്ദേഹം ആരോപിച്ചു.
