കുന്നത്തുനാട് നിയോജക മണ്ഡലത്തിൽ എൽഡിഎഫിനെതിരെ കോൺഗ്രസും ട്വന്റി 20യും ഒന്നിച്ചുനിന്നതോടെ രാഷ്ട്രീയ ചിത്രം മാറി. എൽഡിഎഫിന് ഭരണം നേടാൻ സാധ്യതയുണ്ടായിരുന്ന വടവുകോട്–പുത്തൻകുരിശ് പഞ്ചായത്തിൽ ട്വന്റി 20യുടെ പിന്തുണയോടെ യുഡിഎഫ് അധികാരം പിടിച്ചു. 17 വാർഡുകളിൽ എൽഡിഎഫ്–8, യുഡിഎഫ്–7, ട്വന്റി 20–2 എന്ന നിലയിലായിരുന്നെങ്കിലും ട്വന്റി 20 യുഡിഎഫിനെ പിന്തുണച്ചതോടെയാണ് റെജി തോമസ് പ്രസിഡന്റായത്.
ഇതോടെ കുന്നത്തുനാട് മണ്ഡലത്തിലെ എട്ട് പഞ്ചായത്തുകളിൽ ഒന്നിലും എൽഡിഎഫിന് ഭരണമില്ല. മഴുവന്നൂർ പഞ്ചായത്തിൽ യുഡിഎഫ്–9, എൽഡിഎഫ്–6, ട്വന്റി 20–1, എൻഡിഎ–1 എന്നിങ്ങനെയായിരുന്നു സീറ്റ് നില; ഇവിടെ യുഡിഎഫാണ് ഭരണം. തിരുവാണിയൂരിൽ 9 സീറ്റുകളോടെ ഏറ്റവും വലിയ ഒറ്റക്കക്ഷിയായ ട്വന്റി 20 ഭരണം നേടി; യുഡിഎഫ്–5, എൽഡിഎഫ്–4 എന്നിങ്ങനെയായിരുന്നു മറ്റു സീറ്റുകൾ.
വടവുകോട് ബ്ലോക്ക് പഞ്ചായത്തിൽ നറുക്കെടുപ്പിൽ എൽഡിഎഫ് അനുകൂലമായി ഫലം വന്നു; കോൺഗ്രസിന്റെ സവിത അബ്ദുൽറഹ്മാൻ പരാജയപ്പെട്ടു. എന്നാൽ വൈസ് പ്രസിഡന്റ് സ്ഥാനം യുഡിഎഫിനായി. പൂതൃക്ക പഞ്ചായത്തിൽ യുഡിഎഫിനും ട്വന്റി 20ക്കും 7 വീതം സീറ്റുകൾ ലഭിച്ചതോടെ നറുക്കെടുപ്പ് നടന്നു. പ്രസിഡന്റ് പദവി ട്വന്റി 20 നേടി, വൈസ് പ്രസിഡന്റ് സ്ഥാനം യുഡിഎഫിനായി.
കുന്നത്തുനാട് പഞ്ചായത്തിൽ 21 വാർഡുകളിൽ 12 സീറ്റുകളോടെ യുഡിഎഫ് ഭരണം പിടിച്ചു. കിഴക്കമ്പലം പഞ്ചായത്തിൽ 14 സീറ്റുകൾ നേടി ട്വന്റി 20 അധികാരം നിലനിർത്തി. ഐക്കരനാട് പഞ്ചായത്തിലെ എല്ലാ 16 വാർഡുകളും വിജയിച്ച് ട്വന്റി 20 ഭരണം ഉറപ്പിച്ചു.
