നിർണ്ണായക രാഷ്ട്രീയ ഘട്ടങ്ങളിൽ രാഹുൽ ഗാന്ധി വിദേശയാത്രകൾ നടത്തുന്നത് കോൺഗ്രസിനുള്ളിൽ വലിയ അസ്വസ്ഥതയ്ക്കും അതൃപ്തിക്കും കാരണമാകുന്നുവെന്ന വിമർശനം ശക്തമാകുന്നു. പാർലമെന്റിൽ തൊഴിലുറപ്പ് പദ്ധതിയുമായി ബന്ധപ്പെട്ട നിർണ്ണായക ചർച്ചകൾ പുരോഗമിക്കുമ്പോൾ, രാഹുൽ ഗാന്ധി ജർമ്മനിയിലെ ബിഎംഡബ്ല്യു പ്ലാന്റ് സന്ദർശിക്കുന്ന ദൃശ്യങ്ങൾ പുറത്തുവന്നതാണ് പുതിയ വിവാദങ്ങൾക്ക് തിരികൊളുത്തിയത്.
ഈ സാഹചര്യത്തിലാണ് പ്രിയങ്കാ ഗാന്ധിയെ പാർട്ടി നേതൃത്വത്തിലേക്ക് കൂടുതൽ ശക്തമായി കൊണ്ടുവരണമെന്ന ആവശ്യവുമായി കോൺഗ്രസ് എംപി ഇമ്രാൻ മസൂദ് പരസ്യമായി രംഗത്തെത്തിയത്. പ്രിയങ്കാ ഗാന്ധി ഇന്ദിരാ ഗാന്ധിയെപ്പോലെ കരുത്തുറ്റ നേതാവാണെന്നും, പ്രധാനമന്ത്രിയാകാനുള്ള യോഗ്യത അവർക്കുണ്ടെന്നും അദ്ദേഹം അഭിപ്രായപ്പെട്ടു. അവരെ മുന്നിൽ നിർത്തി പാർട്ടി പ്രവർത്തിക്കണമെന്നാണ് മസൂദിന്റെ ആവശ്യം.
പ്രതിപക്ഷ പാർട്ടികൾ സർക്കാർ വിരുദ്ധ പ്രതിഷേധങ്ങളുമായി തെരുവിലിറങ്ങുമ്പോൾ, രാഹുൽ ഗാന്ധി വിദേശയാത്രകളിൽ തിരക്കിലാകുന്നത് പാർട്ടി പ്രവർത്തകരുടെ ആത്മവിശ്വാസത്തെയും പോരാട്ടവീര്യത്തെയും ദുർബലപ്പെടുത്തുന്നുവെന്നാണ് കോൺഗ്രസിലെ ഒരു വിഭാഗം നേതാക്കളുടെ വിമർശനം. ഈ സാഹചര്യം പാർട്ടിക്കുള്ളിലെ നേതൃത്വ ചർച്ചകൾക്ക് കൂടുതൽ ചൂടേകുന്നതായാണ് സൂചന.
