ഇന്ത്യയുടെ പ്രതിരോധ കയറ്റുമതിയിൽ മറ്റൊരു വലിയ വിജയം കൂടി. ഏറ്റവും ശക്തമായ ബ്രഹ്മോസ് സൂപ്പർസോണിക് ക്രൂയിസ് മിസൈൽ സംവിധാനം വാങ്ങുന്നതിനുള്ള കരാറിൽ ഇന്തോനേഷ്യ ഒപ്പുവച്ചു. ഇന്തോനേഷ്യൻ പ്രതിരോധ മന്ത്രാലയം തിങ്കളാഴ്ച ഇന്ത്യയുമായുള്ള കരാർ ഔദ്യോഗികമായി പ്രഖ്യാപിച്ചു.
സമുദ്രമേഖലയിലെ സൈനിക ഹാർഡ്വെയർ നവീകരിക്കുന്നതിനും പ്രതിരോധ ശേഷി വർദ്ധിപ്പിക്കുന്നതിനുമുള്ള ശ്രമങ്ങളുടെ ഭാഗമാണ് ഈ കരാർ എന്ന് ഇന്തോനേഷ്യൻ പ്രതിരോധ മന്ത്രാലയ വക്താവ് റിക്കോ റിക്കാർഡോ സിറൈത്ത് റോയിട്ടേഴ്സിനോട് പറഞ്ഞു.
2025 ൽ ഇരു രാജ്യങ്ങളുടെയും പ്രതിരോധ മന്ത്രിമാർ തമ്മിലുള്ള ദീർഘകാല ചർച്ചകൾക്കും ഉന്നതതല യോഗത്തിനും ശേഷമാണ് ഈ കരാറിലെത്തിയത്. ഇന്ത്യയിൽ നിന്ന് ബ്രഹ്മോസ് മിസൈലുകൾ വാങ്ങുന്ന രണ്ടാമത്തെ വിദേശ രാജ്യമാണ് ഇന്തോനേഷ്യ. 2022 ൽ 375 മില്യൺ ഡോളറിന്റെ കരാറിൽ ഫിലിപ്പീൻസ് മൂന്ന് ബ്രഹ്മോസ് വാങ്ങിയിരുന്നു , ആദ്യ ബാച്ച് ഡെലിവറികൾ 2024 ൽ പൂർത്തിയായി. ഇന്ത്യയും റഷ്യയും സംയുക്തമായി വികസിപ്പിച്ചെടുത്ത ബ്രഹ്മോസ് മിസൈൽ കര, വ്യോമ, കപ്പലുകൾ, അന്തർവാഹിനികൾ എന്നിവയിൽ നിന്ന് വിക്ഷേപിക്കാൻ കഴിയും.
‘ഓപ്പറേഷൻ സിന്ദൂർ’ സമയത്ത് പാകിസ്ഥാൻ വ്യോമതാവളങ്ങളിൽ അടുത്തിടെ നടത്തിയ ആക്രമണങ്ങളിൽ ബ്രഹ്മോസ് ശ്രദ്ധേയമായ ഫലങ്ങൾ കാണിച്ചിരുന്നു . ഈ മിസൈലിന്റെ വിജയത്തെത്തുടർന്ന്, ഇന്ത്യൻ നാവികസേനയ്ക്കും വ്യോമസേനയ്ക്കും വേണ്ടി കൂടുതൽ ബ്രഹ്മോസ് സംവിധാനങ്ങൾ വാങ്ങാൻ പ്രതിരോധ മന്ത്രാലയം അനുമതി നൽകി. ഈ സാഹചര്യത്തിൽ, ബ്രഹ്മോസ് മിസൈലിലുള്ള അന്താരാഷ്ട്ര താൽപ്പര്യം വർദ്ധിച്ചു.
