ഇസ്രായേൽ സൈന്യം വീണ്ടും ലെബനനിൽ വ്യാപകമായ വ്യോമാക്രമണം നടത്തി. ഹിസ്ബുള്ളയുമായി ബന്ധപ്പെട്ട ലക്ഷ്യങ്ങളെയാണ് പ്രധാനമായും ലക്ഷ്യമിട്ടത്. നിലവിലെ സംഘർഷത്തിൽ ഇതുവരെ നടന്ന ഏറ്റവും വലിയ ആക്രമണമെന്നാണ് റിപ്പോർട്ട്. വെറും പത്ത് മിനിറ്റിനുള്ളിൽ നൂറിലധികം ഹിസ്ബുള്ള കമാൻഡ് സെന്ററുകളും സൈനിക താവളങ്ങളും ഇസ്രായേൽ തകർത്തുവെന്നാണ് വിവരം.
ബെയ്റൂട്ടിന്റെ തെക്കൻ പ്രാന്തപ്രദേശങ്ങൾ, തെക്കൻ ലെബനൻ, കിഴക്കൻ ബെക്കാ താഴ്വര എന്നിവിടങ്ങളിൽ ശക്തമായ ആക്രമണം നടന്നു. ഹിസ്ബുള്ളയുടെ സ്വാധീനത്തിലുള്ള പ്രദേശങ്ങളാണ് ഇവ. 1982ന് ശേഷം ലെബനനെതിരെ നടക്കുന്ന ഏറ്റവും വലിയ സൈനിക നീക്കമാണിതെന്നും വിലയിരുത്തപ്പെടുന്നു. പ്രമുഖ പുരോഹിതൻ സാദിഖ് അൽ-നബുൽസി ആക്രമണത്തിൽ കൊല്ലപ്പെട്ടതായും റിപ്പോർട്ടുകൾ സൂചിപ്പിക്കുന്നു.
ആക്രമണത്തിൽ നിരവധി കെട്ടിടങ്ങൾ തകർന്നു വീണു. മരണസംഖ്യ ഉയരുകയാണെന്നും നൂറുകണക്കിന് പേർക്ക് പരിക്കേറ്റിട്ടുണ്ടെന്നും അധികൃതർ അറിയിച്ചു. പ്രാദേശിക ആശുപത്രികൾ പരിക്കേറ്റവരെ കൊണ്ട് നിറഞ്ഞിരിക്കുകയാണ്. നിരവധി പേർ ഇനിയും അവശിഷ്ടങ്ങൾക്കടിയിൽ കുടുങ്ങിക്കിടക്കുന്നതായി റിപ്പോർട്ടുണ്ട്. രക്ഷാപ്രവർത്തനങ്ങൾ തുടരുകയാണ്.
സംഘർഷം ആരംഭിച്ചതിനുശേഷം ലെബനനിൽ മരണസംഖ്യ 1,500 കടന്നതായി കണക്കുകൾ പറയുന്നു. ഇതിൽ 130 കുട്ടികളും ഉൾപ്പെടുന്നു. ഏകദേശം 12 ലക്ഷം ആളുകൾ കുടിയൊഴിഞ്ഞു, ഇത് രാജ്യത്തെ ജനസംഖ്യയുടെ വലിയൊരു വിഭാഗമാണ്.
അതേസമയം, അമേരിക്കയും ഇറാനും തമ്മിൽ വെടിനിർത്തൽ കരാർ പ്രഖ്യാപിച്ച മണിക്കൂറുകൾക്കുള്ളിലാണ് ആക്രമണം നടന്നത്. പാകിസ്ഥാൻ മധ്യസ്ഥതയിൽ ഉണ്ടായ കരാർ ലെബനനിലും ബാധകമാണെന്ന് ചിലർ വിലയിരുത്തുന്നുണ്ടെങ്കിലും, ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിന്റെ ഓഫീസ് ഇത് നിഷേധിച്ചു.
മറുവശത്ത്, ലെബനൻ പ്രസിഡന്റ് ജോസഫ് ഔൺ പ്രാദേശിക സമാധാന ശ്രമങ്ങളിൽ ലെബനനെ ഉൾപ്പെടുത്തണമെന്ന് ആവശ്യപ്പെട്ടു. ഇറാന്റെ പരമോന്നത നേതാവായ ഖമേനിയുടെ കൊലപാതകത്തിന് പിന്നാലെ ഹിസ്ബുള്ള ഇസ്രായേലിനെതിരെ റോക്കറ്റ് ആക്രമണം നടത്തിയിരുന്നു. എന്നാൽ യുഎസ്-ഇറാൻ കരാറിന് ശേഷം പുതിയ ആക്രമണങ്ങളൊന്നും പ്രഖ്യാപിച്ചിട്ടില്ല.
“ചരിത്രപരമായ വിജയം” പ്രഖ്യാപിച്ച ഹിസ്ബുള്ള, ഔദ്യോഗിക വെടിനിർത്തൽ പ്രഖ്യാപിക്കുന്നതുവരെ കുടിയൊഴിഞ്ഞവരോട് വീടുകളിലേക്ക് മടങ്ങരുതെന്ന് നിർദ്ദേശം നൽകിയിട്ടുണ്ട്.
