ഇന്ത്യയിൽ ജനനനിരക്ക് ഗണ്യമായി കുറയുന്നതിലേക്ക് ശ്രദ്ധ ക്ഷണിച്ചുകൊണ്ട് സ്പേസ് എക്സ് സി.ഇ.ഓ. എലോൺ മസ്ക്. രാജ്യത്തെ ജനസംഖ്യാ സ്ഥിരത നിലനിർത്താൻ ആവശ്യമായ ‘മാറ്റിസ്ഥാപിക്കൽ നിരക്കിനേക്കാൾ’ താഴെയാണ് നിലവിൽ ഇന്ത്യയുടെ ഫെർട്ടിലിറ്റി നിരക്കെന്ന് അദ്ദേഹം എടുത്തുപറഞ്ഞു.
സോഷ്യൽ മീഡിയ പ്ലാറ്റ്ഫോമായ എക്സിലെ (X) തന്റെ പോസ്റ്റിലൂടെയായിരുന്നു മസ്കിന്റെ പ്രതികരണം:
“ഇന്ത്യയുടെ ജനനനിരക്ക് മാറ്റിസ്ഥാപിക്കൽ പരിധിക്കും താഴെയായിക്കഴിഞ്ഞു. പ്രത്യേകിച്ച് ഉന്നത വിദ്യാഭ്യാസം നേടിയവർക്കിടയിൽ, വർഷങ്ങൾക്ക് മുമ്പ് തന്നെ ഇന്ത്യയുടെ ജനനനിരക്ക് ഈ പരിധിക്ക് താഴേക്ക് പോയിരുന്നു.”
ഇന്ത്യയുടെ മൊത്തം ഫെർട്ടിലിറ്റി നിരക്ക് ചരിത്രത്തിലാദ്യമായി ഒരു സ്ത്രീക്ക് 2.1 കുട്ടികൾ എന്ന മാറ്റിസ്ഥാപിക്കൽ പരിധിക്ക് താഴെയായെന്ന് വ്യക്തമാക്കുന്ന ‘AF പോസ്റ്റ്’ പങ്കിട്ട ഡാറ്റയ്ക്ക് മറുപടി നൽകുകയായിരുന്നു അദ്ദേഹം. കഴിഞ്ഞ ദശകത്തിൽ ഇന്ത്യയുടെ ഫെർട്ടിലിറ്റി നിരക്ക് 2.3-ൽ നിന്ന് 1.9 ആയി കുറഞ്ഞുവെന്നും ഡാറ്റ വ്യക്തമാക്കുന്നു. രാജ്യതലസ്ഥാനമായ ഡൽഹിയിലെ ഫെർട്ടിലിറ്റി നിരക്ക് ഫിൻലാൻഡിനേക്കാൾ താഴ്ന്ന് 1.2 ആയി കുറഞ്ഞുവെന്ന ആശങ്കയും ഈ റിപ്പോർട്ടിലുണ്ട്.
പ്രശസ്ത അന്താരാഷ്ട്ര മാഗസിനായ ‘ദി ഇക്കണോമിസ്റ്റ്’ പ്രസിദ്ധീകരിച്ച ലേഖനത്തെ ഉദ്ധരിച്ച് വരും വർഷങ്ങളിൽ ഇന്ത്യയുടെ ജനസംഖ്യ മുൻപ് കണക്കാക്കിയതിനേക്കാൾ വേഗത്തിൽ ചുരുങ്ങാൻ തുടങ്ങുമെന്ന് AF പോസ്റ്റ് ചൂണ്ടിക്കാണിക്കുന്നു. ഐക്യരാഷ്ട്രസഭയുടെ ജനസംഖ്യാ ഫണ്ടിന്റെ റിപ്പോർട്ടിലും ഈ പ്രവണത വ്യക്തമാണ്.
