മഹാരാഷ്ട്രയിൽ മായം ചേർത്ത ഭക്ഷ്യവസ്തുക്കൾക്കെതിരെ കർശന നടപടികളുമായി ഐഎഎസ് ഉദ്യോഗസ്ഥൻ തുക്കാറാം മുണ്ടെ. സംസ്ഥാന ഭക്ഷ്യ-മരുന്ന് അഡ്മിനിസ്ട്രേഷൻ (എഫ്ഡിഎ) കമ്മീഷണറായി ചുമതലയേറ്റതിന് പിന്നാലെ സംസ്ഥാനവ്യാപകമായി പരിശോധനകൾ ശക്തമാക്കിയിരിക്കുകയാണ് അദ്ദേഹം.
2005 ബാച്ചിലെ ഐഎഎസ് ഉദ്യോഗസ്ഥനായ തുക്കാറാം മുണ്ടെ, 21 വർഷത്തെ ഔദ്യോഗിക ജീവിതത്തിനിടെ 25 തവണ സ്ഥലംമാറ്റം നേരിട്ട ഉദ്യോഗസ്ഥനാണ്. അഴിമതിക്കെതിരായ കർശന നിലപാടും വിട്ടുവീഴ്ചയില്ലാത്ത പ്രവർത്തന ശൈലിയുമാണ് അദ്ദേഹത്തെ ശ്രദ്ധേയനാക്കിയത്.
മെയ് 25ന് എഫ്ഡിഎ കമ്മീഷണറായി ചുമതലയേറ്റ ശേഷം, ‘സുരക്ഷിത ഭക്ഷണം, സുരക്ഷിത മരുന്നുകൾ, സുരക്ഷിത മഹാരാഷ്ട്ര’ എന്ന ലക്ഷ്യവുമായി മായം ചേർക്കലിനെതിരായ നടപടികൾ അദ്ദേഹം ആരംഭിച്ചു. ജൂലൈ 14, 15 തീയതികളിൽ ഡയറികൾ, റെസ്റ്റോറന്റുകൾ, ഭക്ഷ്യ ഉൽപാദന യൂണിറ്റുകൾ എന്നിവിടങ്ങളിൽ പ്രത്യേക പരിശോധനകൾ നടന്നു.
പരിശോധനയിൽ ശുചിത്വ മാനദണ്ഡങ്ങളുടെ ലംഘനവും ഭക്ഷ്യസുരക്ഷാ വീഴ്ചകളും കണ്ടെത്തിയതിനെ തുടർന്ന് മുംബൈയിലെ പ്രമുഖ ‘പാർസി ഡയറി ഫാം’ സ്ഥാപനത്തിന്റെ ഭക്ഷ്യ ലൈസൻസ് അധികൃതർ സസ്പെൻഡ് ചെയ്തു. ഈ പരിശോധനാ നടപടികളിൽ മാത്രം 1.90 കോടി രൂപയിലധികം വിലമതിക്കുന്ന ഭക്ഷ്യ ഉൽപന്നങ്ങൾ പിടിച്ചെടുത്തതായാണ് റിപ്പോർട്ട്.
തുക്കാറാം മുണ്ടെ ചുമതലയേറ്റതിന് ശേഷം മായം ചേർത്ത പാൽ, പാലുൽപ്പന്നങ്ങൾ, രാസവസ്തുക്കൾ ഉപയോഗിച്ച് പഴുപ്പിച്ച പഴങ്ങൾ, നിരോധിത പുകയില ഉൽപന്നങ്ങൾ, വ്യാജ ലേബലുകളുള്ള ഭക്ഷ്യ എണ്ണകൾ തുടങ്ങിയവക്കെതിരെ നിരവധി പരിശോധനകളാണ് നടന്നത്. നിയമലംഘനം കണ്ടെത്തിയ സ്ഥാപനങ്ങൾക്കെതിരെ നടപടി സ്വീകരിക്കുകയും ചിലർക്കെതിരെ കേസുകൾ രജിസ്റ്റർ ചെയ്യുകയും ചെയ്തു.
സത്യസന്ധമായി പ്രവർത്തിക്കുന്ന വ്യാപാരികൾ ആശങ്കപ്പെടേണ്ടതില്ലെന്നും, ജനങ്ങളുടെ ആരോഗ്യവുമായി കളിക്കുന്നവർക്കെതിരെ കർശന നടപടി തുടരുമെന്നും തുക്കാറാം മുണ്ടെ വ്യക്തമാക്കി.
പരിശോധനകൾക്ക് പൊതുജനങ്ങളിൽ നിന്ന് പിന്തുണ ലഭിക്കുന്നുണ്ടെങ്കിലും, ചില നടപടികൾ നിയമപരമായ വെല്ലുവിളികൾക്കും വഴിവെച്ചിട്ടുണ്ട്. എന്നിരുന്നാലും, പൊതുജനാരോഗ്യ സംരക്ഷണത്തിന് മുൻഗണന നൽകി പ്രവർത്തനം തുടരുമെന്നാണ് തുക്കാറാം മുണ്ടെയുടെ നിലപാട്.
