തൃശൂരിലെ വെടിക്കെട്ട് പുരയില് ഉണ്ടായ അപകടത്തില് പരിക്കേറ്റവര്ക്ക് ആവശ്യമായ ചികിത്സാ സഹായങ്ങള് ഉറപ്പാക്കാന് സര്ക്കാര് സംവിധാനങ്ങള് പൂര്ണ സജ്ജമാണെന്ന് മുഖ്യമന്ത്രി പിണറായി വിജയന് അറിയിച്ചു. സ്ഫോടനത്തെ തുടര്ന്ന് രക്ഷാപ്രവര്ത്തനത്തിന് ആവശ്യമായ എല്ലാ നടപടികളും സ്വീകരിച്ചിട്ടുണ്ടെന്നും അദ്ദേഹം വ്യക്തമാക്കി.
പൊള്ളലേറ്റവര്ക്ക് മികച്ച ചികിത്സ ലഭ്യമാക്കുന്നതിനായി ആവശ്യമായ പക്ഷം സംസ്ഥാനത്തിന് പുറത്തുള്ള ആശുപത്രികളിലെ വിദഗ്ധ ഡോക്ടര്മാരുടെ സേവനവും വിനിയോഗിക്കുമെന്ന് മുഖ്യമന്ത്രി പറഞ്ഞു.
സംഭവവുമായി ബന്ധപ്പെട്ട പ്രവര്ത്തനങ്ങള് നിരീക്ഷിക്കാന് പ്രത്യേക സംവിധാനം ഒരുക്കിയിട്ടുണ്ട്. പൊലീസ്, ഫയര് ആന്ഡ് റെസ്ക്യൂ, ആരോഗ്യവകുപ്പ്, റവന്യു, ദുരന്തനിവാരണ വകുപ്പുകള് എന്നിവയുടെ ഏകോപനത്തിലൂടെയാണ് രക്ഷാപ്രവര്ത്തനം പുരോഗമിക്കുന്നത്.
അപകടത്തില് ജീവന് നഷ്ടപ്പെട്ടവരുടെ വേര്പാടില് അഗാധമായ ദുഃഖവും അനുശോചനവും മുഖ്യമന്ത്രി രേഖപ്പെടുത്തി. അവരുടെ കുടുംബാംഗങ്ങളുടെയും പ്രിയപ്പെട്ടവരുടെയും വേദനയില് പങ്കുചേരുന്നതായും അദ്ദേഹം ഫെയ്സ്ബുക്ക് പോസ്റ്റിലൂടെ അറിയിച്ചു.
മുഖ്യമന്ത്രിയുടെ ഫേസ്ബുക് പോസ്റ്റ്:
തൃശൂരിലെ വെടിക്കെട്ട് പുരയിലുണ്ടായ അപ്രതീക്ഷിത സ്ഫോടനവാര്ത്ത ഏറെ നടുക്കുന്നതാണ്. സ്ഫോടനവുമായി ബന്ധപ്പെട്ട് രക്ഷാപ്രവര്ത്തനത്തിന് ആവശ്യമായ എല്ലാ നടപടികളും സ്വീകരിച്ചിട്ടുണ്ട്. എല്ലാവിധ ചികിത്സാ സഹായങ്ങളും ലഭ്യമാക്കാന് സര്ക്കാര് സംവിധാനങ്ങളെയാകെ സജ്ജമാക്കിയിട്ടുണ്ട്.
പൊള്ളലേറ്റവര്ക്ക് വിദഗ്ധ ചികിത്സ ലഭ്യമാക്കാന് ആവശ്യമെങ്കില് സംസ്ഥാനത്തിന് പുറത്തുള്ള ആശുപത്രികളിലെ വിദഗ്ധ ഡോക്ടര്മാരുടെ സേവനം ഉപയോഗപ്പെടുത്തും. പ്രവര്ത്തനങ്ങള് മോണിറ്റര് ചെയ്യാന് പ്രത്യേക സംവിധാനം ഒരുക്കിയിട്ടുണ്ട്. പോലീസ്, ഫയര് ആന്ഡ് റെസ്ക്യൂ , ആരോഗ്യവകുപ്പുകളുടെ എല്ലാ സംവിധാനങ്ങളെയും റവന്യു, ദുരന്തനിവാരണ വകുപ്പുകളെയും ഏകോപിപ്പിച്ചുള്ള പ്രവര്ത്തനങ്ങളാണ് നടക്കുന്നത്.
അപകടത്തില് ജീവന് നഷ്ടപ്പെട്ടവരുടെ വേര്പാടില് അഗാധമായ ദുഃഖവും അനുശോചനവും രേഖപ്പെടുത്തുന്നു. അവരുടെ കുടുംബാംഗങ്ങളുടെയും പ്രിയപ്പെട്ടവരുടെയും വേദനയില് പങ്കുചേരുന്നു
