സംസ്ഥാനത്തിന്റെ വികസന കാഴ്ചപ്പാടുകളും നിക്ഷേപാധിഷ്ഠിത വളർച്ചാ പദ്ധതികളും മുന്നോട്ടുവെച്ച് യുഡിഎഫ് സർക്കാരിന്റെ ആദ്യ ബജറ്റ് മുഖ്യമന്ത്രി വി.ഡി. സതീശൻ അവതരിപ്പിച്ചു. വൻകിട അടിസ്ഥാനസൗകര്യ പദ്ധതികൾ, ആരോഗ്യം, വിദ്യാഭ്യാസം, കൃഷി, ടൂറിസം, വ്യവസായം തുടങ്ങിയ മേഖലകളിൽ പുതിയ പ്രഖ്യാപനങ്ങൾ ബജറ്റിലുണ്ടായെങ്കിലും ക്ഷേമപെൻഷൻ വർധനവ് ഉൾപ്പെടെയുള്ള ക്ഷേമമേഖലയിലെ പ്രതീക്ഷകൾക്ക് തിരിച്ചടിയായി.
സ്ത്രീകൾക്കുള്ള കെഎസ്ആർടിസി സൗജന്യ യാത്രാ പദ്ധതിയായ ‘പ്രിയദർശിനി’ക്ക് 600 കോടി രൂപ വകയിരുത്തി. ഇന്ദിരാ ഗ്യാരണ്ടിയുടെ ഭാഗമായി ഒരു കുടുംബത്തിന് 25 ലക്ഷം രൂപയുടെ പരിരക്ഷ ഉറപ്പാക്കുന്ന ഉമ്മൻചാണ്ടി ആരോഗ്യ ഇൻഷുറൻസ് പദ്ധതിയുടെ പ്രാരംഭ പ്രവർത്തനങ്ങൾക്ക് 10 കോടി രൂപയും അനുവദിച്ചു.
കേരളത്തെ ആഗോള മാരിടൈം ഹബ്ബാക്കി മാറ്റുക എന്ന ലക്ഷ്യത്തോടെ ‘മിഷൻ സമുദ്ര’ പദ്ധതിക്ക് 400 കോടി രൂപ അനുവദിച്ചു. വിഴിഞ്ഞത്ത് കപ്പൽ നിർമാണ കേന്ദ്രം, മാരിടൈം മ്യൂസിയം, തുറമുഖ വികസനം എന്നിവ പദ്ധതിയുടെ ഭാഗമാകും. തിരുവനന്തപുരം-കൊല്ലം-ആലപ്പുഴ മേഖലകളെ ബന്ധിപ്പിക്കുന്ന സതേൺ കേരള ഇക്കണോമിക് കോറിഡോറിനും ബജറ്റിൽ പ്രഖ്യാപനമുണ്ട്.
തിരുവനന്തപുരം-കോഴിക്കോട് ലൈറ്റ് മെട്രോ പദ്ധതിക്ക് തുടക്കമിടുന്നതിനായി 20 കോടി രൂപയും ഏവിയേഷൻ ഹബ്ബിന് 200 കോടി രൂപയും അനുവദിച്ചു. ഗ്രീൻ ഹൈഡ്രജൻ ഹബ്ബിനായി 100 കോടി രൂപയും കേരള ഹെൽത്ത് ആൻഡ് ലൈഫ് സയൻസ് സിറ്റിക്ക് 100 കോടി രൂപയും വകയിരുത്തി.
കൃഷി മേഖലയ്ക്ക് പ്രത്യേക പരിഗണന നൽകിയ ബജറ്റിൽ റബറിന്റെ താങ്ങുവില കിലോയ്ക്ക് 200 രൂപയിൽ നിന്ന് 250 രൂപയാക്കി ഉയർത്തി. വനിതാ കർഷകരുടെ ശാക്തീകരണത്തിനായി ‘കൃഷി സഖി’ പദ്ധതി നടപ്പാക്കുമെന്നും പ്രഖ്യാപിച്ചു. ക്ഷീരോത്പാദനം അടുത്ത മൂന്ന് വർഷത്തിനകം ഒരു കോടി ലിറ്ററിലെത്തിക്കുകയാണ് ലക്ഷ്യം.
ആരോഗ്യ മേഖലയിൽ തിരുവനന്തപുരം രണ്ടാം മെഡിക്കൽ കോളേജ്, ഹരിപ്പാട് മെഡിക്കൽ കോളേജ്, മലപ്പുറം കാൻസർ സെന്റർ എന്നിവ പ്രഖ്യാപിച്ചു. 40 വയസ്സിന് മുകളിലുള്ളവർക്ക് വാർഷിക ആരോഗ്യ പരിശോധനയും സ്കൂൾ ഹെൽത്ത് ബ്രിഗേഡും നടപ്പാക്കും. അപൂർവ രോഗങ്ങൾക്കുള്ള ചികിത്സാ സഹായവും ഉറപ്പാക്കും.
വിദ്യാഭ്യാസ മേഖലയ്ക്ക് 1478.57 കോടി രൂപ അനുവദിച്ചു. സ്കൂളുകളിലെ പെൺകുട്ടികൾക്ക് സൗജന്യ സാനിറ്ററി നാപ്കിനുകൾ നൽകുന്ന പദ്ധതിയും പ്രഖ്യാപിച്ചു. വയനാട് ട്രൈബൽ സർവകലാശാലയ്ക്ക് 50 കോടി രൂപയും ഗവേഷണ പാർക്കിന് 60 കോടി രൂപയും അനുവദിച്ചു.
വ്യവസായ വികസനത്തിനായി 1115.48 കോടി രൂപ വകയിരുത്തി. നിക്ഷേപം ആകർഷിക്കാൻ ‘ഇൻവെസ്റ്റ് കേരള’ പദ്ധതിയും രൂപീകരിക്കും. സ്റ്റാർട്ടപ്പുകൾ, ഗവേഷണ കേന്ദ്രങ്ങൾ, സ്മാർട്ട് വ്യവസായങ്ങൾ എന്നിവയുടെ വികസനത്തിനായി 50 കോടി രൂപ നീക്കിവെച്ചു.
ടൂറിസം മേഖലയെ വ്യവസായമായി പ്രഖ്യാപിക്കുമെന്നും മുസിരിസ് പദ്ധതി വിപുലീകരിക്കുമെന്നും മുഖ്യമന്ത്രി അറിയിച്ചു. തീർഥാടന ടൂറിസം സർക്യൂട്ടിനും ഉത്തരവാദിത്ത ടൂറിസം വികസനത്തിനും പ്രത്യേക പദ്ധതികൾ നടപ്പാക്കും.
കായിക മേഖലയിൽ 2036 ഒളിമ്പിക്സ് ലക്ഷ്യമിട്ട് ‘മിഷൻ 2036’ പദ്ധതി പ്രഖ്യാപിച്ചു. മലബാറിൽ അന്താരാഷ്ട്ര നിലവാരത്തിലുള്ള ഫുട്ബോൾ സ്റ്റേഡിയത്തിനായി 50 കോടി രൂപ വകയിരുത്തി.
അതേസമയം, ക്ഷേമപെൻഷനിൽ വർധനവ് പ്രഖ്യാപിക്കാതിരുന്നതും സർക്കാർ ജീവനക്കാർ പ്രതീക്ഷിച്ച ആനുകൂല്യങ്ങൾ ബജറ്റിൽ ഉൾപ്പെടാതിരുന്നതും ശ്രദ്ധേയമായി. ഡി.എ, ഡി.ആർ എന്നിവ മുടക്കമില്ലാതെ വിതരണം ചെയ്യുമെന്നും മെഡിസെപ്പ് പദ്ധതി സമഗ്രമായി പരിഷ്കരിക്കുമെന്നും മുഖ്യമന്ത്രി അറിയിച്ചു.
കിഫ്ബിയെ സമഗ്രമായി പുനഃസംഘടിപ്പിക്കുന്നതിനായി വിദഗ്ധ സമിതിയെ നിയോഗിക്കുമെന്നും ബജറ്റിൽ പ്രഖ്യാപിച്ചിട്ടുണ്ട്. സംസ്ഥാനത്തിന്റെ സാമ്പത്തിക പുനരുജ്ജീവനത്തിനും നിക്ഷേപ വളർച്ചയ്ക്കും മുൻഗണന നൽകുന്നതാണ് യുഡിഎഫ് സർക്കാരിന്റെ ആദ്യ ബജറ്റിന്റെ മുഖ്യസന്ദേശം.
