സർക്കാർ സ്കൂളിലെ വിദ്യാർത്ഥികളുമായി ബന്ധപ്പെട്ട വിവാദ വീഡിയോയുടെ പശ്ചാത്തലത്തിൽ വ്യവസായ മന്ത്രി കീർത്തനയ്ക്കെതിരെ രൂക്ഷ വിമർശനവുമായി പ്രതിപക്ഷ നേതാവ് ഉദയനിധി സ്റ്റാലിൻ. സാമൂഹിക മാധ്യമങ്ങളിലെ പ്രചാരണത്തിനായി സ്കൂൾ കുട്ടികളെ ഉപയോഗിക്കരുതെന്നും വിദ്യാർത്ഥികളുടെ ആത്മവിശ്വാസത്തെ ബാധിക്കുന്ന സമീപനം അംഗീകരിക്കാനാവില്ലെന്നും അദ്ദേഹം വ്യക്തമാക്കി.
വിരുദുനഗർ ജില്ലയിലെ ശിവകാശിക്കടുത്തുള്ള തിരുതങ്കൽ ഗവൺമെന്റ് ഗേൾസ് ഹയർ സെക്കൻഡറി സ്കൂളിൽ നടത്തിയ സന്ദർശനത്തിനിടെയാണ് വിവാദത്തിന് ഇടയായ സംഭവം നടന്നത്. പരിശോധനയ്ക്കിടെ മന്ത്രി കീർത്തന ക്ലാസ് മുറിയിൽ പ്രവേശിച്ച് വിദ്യാർത്ഥികളോട് ഇംഗ്ലീഷിൽ ചോദ്യങ്ങൾ ചോദിച്ചു. ചില വിദ്യാർത്ഥികൾക്ക് ചോദ്യങ്ങൾക്ക് മറുപടി നൽകാൻ കഴിയാതിരുന്നതിനെ തുടർന്ന് മന്ത്രി നടത്തിയ പരാമർശങ്ങൾ ഉൾപ്പെട്ട വീഡിയോ പിന്നീട് സാമൂഹിക മാധ്യമങ്ങളിൽ വ്യാപകമായി പ്രചരിക്കുകയായിരുന്നു.
വീഡിയോയിൽ, “ഒന്നാം ബെഞ്ചിൽ ഇരിക്കുന്ന വിദ്യാർത്ഥികളുടെ അവസ്ഥ ഇങ്ങനെയാണെങ്കിൽ അവസാന ബെഞ്ചിലെ വിദ്യാർത്ഥികളുടെ കാര്യം എന്താകും” എന്ന തരത്തിലുള്ള പരാമർശം മന്ത്രി നടത്തിയെന്നാണ് വിമർശകർ ആരോപിക്കുന്നത്. ഇതോടെയാണ് സംഭവം രാഷ്ട്രീയ വിവാദമായി മാറിയത്.
സംഭവത്തെക്കുറിച്ച് എക്സ് പ്ലാറ്റ്ഫോമിൽ പ്രതികരിച്ച ഉദയനിധി സ്റ്റാലിൻ, സർക്കാർ സ്കൂളുകളിലെ ഇംഗ്ലീഷ് പരിജ്ഞാനം പരിശോധിക്കുന്നതിന്റെ പേരിൽ വിദ്യാർത്ഥികളെ പൊതുവേദിയിൽ അപമാനിക്കുന്നത് അംഗീകരിക്കാനാകില്ലെന്ന് പറഞ്ഞു. വിദ്യാർത്ഥികളോട് എങ്ങനെ പെരുമാറണം, ഏത് സാഹചര്യത്തിലാണ് ക്യാമറകൾ ഒഴിവാക്കേണ്ടത് എന്നീ കാര്യങ്ങൾ മന്ത്രിമാർ മനസിലാക്കണമെന്നും അദ്ദേഹം അഭിപ്രായപ്പെട്ടു.
“കുട്ടികളിൽ ആത്മവിശ്വാസം വളർത്തുക എന്നതാണ് നമ്മുടെ ഉത്തരവാദിത്തം. അവരുടെ ആത്മവിശ്വാസം തകർക്കുന്ന പ്രവൃത്തികൾക്ക് യാതൊരു ന്യായീകരണവും ഇല്ല. പ്രചാരണത്തിനും സാമൂഹിക മാധ്യമ റീലുകൾക്കുമായി സ്കൂൾ വിദ്യാർത്ഥികളെ ഉപയോഗിക്കരുത്,” എന്നായിരുന്നു ഉദയനിധിയുടെ വിമർശനം.
സംഭവവുമായി ബന്ധപ്പെട്ട വീഡിയോ സോഷ്യൽ മീഡിയയിൽ വ്യാപകമായി ചർച്ച ചെയ്യപ്പെടുന്നതിനിടെ, വിദ്യാഭ്യാസ മേഖലയിലെ വിദഗ്ധരും സാമൂഹിക പ്രവർത്തകരും വിദ്യാർത്ഥികളുടെ മാനസികാവസ്ഥയെ ബാധിക്കുന്ന തരത്തിലുള്ള പൊതുപരാമർശങ്ങൾ ഒഴിവാക്കേണ്ടതിന്റെ ആവശ്യകത ചൂണ്ടിക്കാട്ടിയിട്ടുണ്ട്.
