ഇന്ത്യൻ കോർപ്പറേറ്റ് രംഗത്ത് ശ്രദ്ധേയമായ മാറ്റത്തിന് സാക്ഷ്യം വഹിച്ച് മുകേഷ് അംബാനിയുടെ നേതൃത്വത്തിലുള്ള റിലയൻസ് ഇൻഡസ്ട്രീസ്. കമ്പനിയുടെ വിപണി മൂല്യം രാജ്യത്തെ അഞ്ച് പ്രമുഖ ഐടി കമ്പനികളുടെ സംയോജിത വിപണി മൂല്യത്തിനോട് അടുക്കുന്ന നിലയിലെത്തി.
വെള്ളിയാഴ്ച വ്യാപാരം അവസാനിക്കുമ്പോൾ റിലയൻസിന്റെ വിപണി മൂലധനം ഏകദേശം 18 ലക്ഷം കോടി രൂപയായി. അതേസമയം, ടിസിഎസ്, ഇൻഫോസിസ്, എച്ച്സിഎൽ ടെക്, വിപ്രോ, ടെക് മഹീന്ദ്ര എന്നീ അഞ്ച് മുൻനിര ഐടി കമ്പനികളുടെ ആകെ വിപണി മൂല്യം 18.12 ലക്ഷം കോടി രൂപയായിരുന്നു.
ആർട്ടിഫിഷ്യൽ ഇന്റലിജൻസിന്റെ വളർച്ച, ആഗോള സാങ്കേതിക ചെലവുകളിലെ ഇടിവ്, സാമ്പത്തിക അനിശ്ചിതത്വം തുടങ്ങിയ ഘടകങ്ങൾ ഐടി ഓഹരികളെ സമ്മർദ്ദത്തിലാക്കിയിട്ടുണ്ട്. ഇതോടെ ഈ വർഷം ഐടി കമ്പനികളുടെ ഓഹരി വിലയിൽ 36 ശതമാനം വരെ ഇടിവുണ്ടായി.
അതേസമയം, അന്താരാഷ്ട്ര ഊർജ്ജ വിപണിയിലെ അനിശ്ചിതത്വങ്ങൾ മൂലം റിലയൻസിന്റെ ഓഹരിക്കും തിരിച്ചടി നേരിട്ടിട്ടുണ്ട്. ഈ വർഷം കമ്പനിയുടെ ഓഹരി വില ഏകദേശം 17 ശതമാനം ഇടിഞ്ഞെങ്കിലും, ബിസിനസ് വൈവിധ്യവൽക്കരണത്തിലൂടെ വളർച്ചയുടെ പുതിയ വഴികൾ തേടുകയാണ് റിലയൻസ്.
ജിയോ പ്ലാറ്റ്ഫോമുകളുടെ ഐപിഒയ്ക്ക് തയ്യാറെടുക്കുന്ന കമ്പനി, 35,000 മുതൽ 40,000 കോടി രൂപ വരെ സമാഹരിച്ച് കടബാധ്യത കുറയ്ക്കാനാണ് ലക്ഷ്യമിടുന്നത്. ഇന്ത്യൻ കോർപ്പറേറ്റ് രംഗത്തെ ശക്തിസമവാക്യങ്ങൾ മാറുന്നതിന്റെ സൂചനയായാണ് ഈ പുതിയ കണക്കുകൾ വിലയിരുത്തപ്പെടുന്നത്.
