തെരഞ്ഞെടുപ്പ് ഫലം: സഖ്യകക്ഷികൾക്ക് നന്ദി അറിയിച്ച് എം.കെ. സ്റ്റാലിൻ; കോൺഗ്രസിനെ ഒഴിവാക്കി

2026ലെ നിയമസഭാ തെരഞ്ഞെടുപ്പിൽ അധികാരം നേടുന്നതിൽ പരാജയപ്പെട്ടെങ്കിലും സെക്കുലർ പ്രോഗ്രസീവ് അലയൻസ് (എസ്പിഎ)യിലെ എല്ലാ സഖ്യകക്ഷികൾക്കും, പാർട്ടി പ്രവർത്തകർക്കും, നേതാക്കൾക്കും നന്ദി അറിയിച്ച് തമിഴ്‌നാട് മുൻ മുഖ്യമന്ത്രി കൂടിയും ഡിഎംകെ പ്രസിഡന്റുമായ എം.കെ. സ്റ്റാലിൻ രംഗത്തെത്തി.

തമിഴ്‌നാടിന്റെ അവകാശങ്ങളും ക്ഷേമവും സംരക്ഷിക്കുന്നതിൽ സഖ്യം പ്രതിജ്ഞാബദ്ധമാണെന്നും സംസ്ഥാനത്തിന്റെ ഫെഡറൽ അവകാശങ്ങളും സാമൂഹ്യനീതി ചട്ടക്കൂടും ദുർബലപ്പെടുത്താനുള്ള ശ്രമങ്ങൾക്കെതിരെ ഐക്യത്തോടെ മുന്നോട്ട് പോകുമെന്നും സ്റ്റാലിൻ വ്യക്തമാക്കി. വിശദമായ പ്രസ്താവനയിലാണ് അദ്ദേഹം ഈ നിലപാട് അറിയിച്ചത്.

2019 മുതൽ രണ്ട് ലോക്‌സഭാ തെരഞ്ഞെടുപ്പുകൾ, രണ്ട് നിയമസഭാ തെരഞ്ഞെടുപ്പുകൾ, തദ്ദേശ തെരഞ്ഞെടുപ്പുകൾ, ഉപതിരഞ്ഞെടുപ്പുകൾ എന്നിവയുൾപ്പെടെ നിരവധി രാഷ്ട്രീയ പോരാട്ടങ്ങൾ സഖ്യം ഒന്നിച്ചാണ് നേരിട്ടതെന്ന് അദ്ദേഹം ചൂണ്ടിക്കാട്ടി. 2026 തെരഞ്ഞെടുപ്പ് പ്രചാരണത്തിനിടെ നിരവധി പുതിയ പാർട്ടികൾ സഖ്യത്തിൽ ചേർന്നത് മുന്നണിയെ കൂടുതൽ ശക്തമാക്കിയതായും അദ്ദേഹം പറഞ്ഞു.

പ്രചാരണ സമയത്ത് പിന്തുണ നൽകിയ സഖ്യ നേതാക്കളായ കെ. സെൽവപെരുന്തഗൈ, വൈകോ, പ്രേമലത വിജയകാന്ത്, തോൽ. തിരുമാവളവൻ, എം. വീരപാണ്ഡ്യൻ, പി. ഷൺമുഖം, കെ.എം. കാദർ മൊഹിദീൻ, എം.എച്ച്. ജവാഹറുള്ള, ഇ.ആർ. ഈശ്വരൻ തുടങ്ങിയവർക്കും സ്റ്റാലിൻ നന്ദി രേഖപ്പെടുത്തി.

പ്രചാരണ രാഷ്ട്രീയത്തിൽ നേരിട്ട് പങ്കെടുത്തിട്ടില്ലാത്തെങ്കിലും പിന്തുണ നൽകിയ കെ. വീരമണിയെയും കമൽഹാസനെയും അദ്ദേഹം പ്രത്യേകം പരാമർശിച്ചു. സഖ്യത്തിനായി പ്രവർത്തിച്ച എല്ലാവരുടെയും വിശ്വാസം താൻ വിലമതിക്കുന്നതായും സ്റ്റാലിൻ പറഞ്ഞു.

സഖ്യ നേതാവെന്ന നിലയിൽ സീറ്റ് വിഭജനം, പ്രചാരണ ഏകോപനം തുടങ്ങിയ എല്ലാ തീരുമാനങ്ങളുടെയും ഉത്തരവാദിത്തം താൻ ഏറ്റെടുക്കുന്നതായി സ്റ്റാലിൻ വ്യക്തമാക്കി. പ്രചാരണത്തിനിടെ ഏതെങ്കിലും സഖ്യ നേതാക്കൾക്ക് അസൗകര്യം ഉണ്ടായിട്ടുണ്ടെങ്കിൽ അതിൽ ഖേദം രേഖപ്പെടുത്തുന്നതായും അദ്ദേഹം പറഞ്ഞു.

തെരഞ്ഞെടുപ്പ് ഫലത്തെക്കുറിച്ച് പ്രതികരിക്കുമ്പോൾ, സഖ്യം പൂർണ്ണ വിജയം നേടാനായില്ലെങ്കിലും 1.54 കോടിയിലധികം വോട്ടുകളും 72 സീറ്റുകളും നേടിയത് ജനങ്ങളുടെ വിശ്വാസം തുടരുന്നതിന്റെ തെളിവാണെന്ന് അദ്ദേഹം പറഞ്ഞു.

തെരഞ്ഞെടുപ്പിന് ശേഷവും ഡിഎംകെയുമായുള്ള സഹകരണം തുടരുമെന്ന് പല സഖ്യകക്ഷികളും വ്യക്തമാക്കിയതായും അദ്ദേഹം കൂട്ടിച്ചേർത്തു. ഐക്യത്തോടെ മുന്നോട്ട് പോകുമെന്നും തമിഴ്‌നാടിന്റെ അവകാശങ്ങൾക്കായി പോരാട്ടം തുടരുമെന്നും സ്റ്റാലിൻ വ്യക്തമാക്കി.