ബംഗ്ലാദേശിൽ ജെറ്റ് ഇന്ധനവിലയിൽ 80 ശതമാനം വർധനവ്. മാർച്ചിൽ ഇത് രണ്ടാം തവണയാണ് നിരക്ക് ഉയർത്തുന്നതെന്ന് ദേശീയ റെഗുലേറ്റർ അറിയിച്ചു. പശ്ചിമേഷ്യൻ സംഘർഷത്തെ തുടർന്ന് ആഗോള വിപണിയിൽ ഉണ്ടായ വിലചാഞ്ചാട്ടമാണ് ഈ തീരുമാനത്തിന് കാരണമെന്ന് ബംഗ്ലാദേശ് എനർജി റെഗുലേറ്ററി കമ്മീഷൻ (ബിഇആർസി) വ്യക്തമാക്കി.
അന്താരാഷ്ട്ര ഇന്ധനവില കുത്തനെ ഉയർന്ന സാഹചര്യത്തിൽ ഈ മാസം രണ്ടാം തവണയും ജെറ്റ് ഇന്ധനവിലയിൽ മാറ്റം വരുത്തേണ്ടിവന്നതായി ബിഇആർസി ചെയർമാൻ ജലാൽ അഹമ്മദ് വ്യക്തമാക്കി. പുതിയ നിരക്കുപ്രകാരം അന്താരാഷ്ട്ര വിമാന സർവീസുകൾക്ക് ലിറ്ററിന് 1.32 ഡോളറാണ് ജെറ്റ് ഇന്ധനവില. പ്രാദേശികവും വിദേശവുമായ വിമാനക്കമ്പനികൾക്ക് ഇത് ബാധകമാകും. ചൊവ്വാഴ്ച അർദ്ധരാത്രി മുതൽ പുതുക്കിയ നിരക്കുകൾ പ്രാബല്യത്തിൽ വന്നു.
മാസത്തിന്റെ തുടക്കത്തിൽ ജെറ്റ് ഇന്ധനവില വർധിപ്പിക്കാൻ ബിഇആർസി സമാനമായ നീക്കം നടത്തിയിരുന്നെങ്കിലും അടിയന്തര അവലോകനത്തെ തുടർന്ന് തീരുമാനം താൽക്കാലികമായി നിർത്തിവച്ചിരുന്നു.
ഇന്ധനവില വർധനയെ തുടർന്ന് സാഹചര്യം വിലയിരുത്താൻ ബംഗ്ലാദേശ് പ്രധാനമന്ത്രി താരിഖ് റഹ്മാൻ പ്രത്യേക യോഗം ചേർന്നതായി റിപ്പോർട്ടുകൾ പറയുന്നു. പശ്ചിമേഷ്യൻ സംഘർഷം മൂലം ആഗോള എണ്ണവില ഉയരുന്നത് മറ്റ് ദക്ഷിണേഷ്യൻ രാജ്യങ്ങളെയും ബാധിച്ചിട്ടുണ്ട്.
പാകിസ്ഥാനിൽ പെട്രോൾ, ഹൈസ്പീഡ് ഡീസൽ വിലയിൽ മാറ്റമില്ലെങ്കിലും ജെറ്റ് ഇന്ധനത്തിന്റെയും മണ്ണെണ്ണയുടെയും വില വർധിപ്പിച്ചതായി റിപ്പോർട്ടുണ്ട്. ഇന്ത്യയും നേപ്പാളും വിമാന ഇന്ധനവിലയിൽ മാറ്റം വരുത്തിയിട്ടില്ല.
ഇറക്കുമതിയെയാണ് ബംഗ്ലാദേശ് തന്റെ ഊർജാവശ്യങ്ങളുടെ 95 ശതമാനവും ആശ്രയിക്കുന്നത്. ഇന്ത്യയുമായി ഉള്ള കരാർ പ്രകാരം വർഷംതോറും 1.8 ലക്ഷം ടൺ ഡീസൽ പൈപ്പ്ലൈൻ വഴി ബംഗ്ലാദേശിലേക്ക് എത്തുമെന്ന് പ്രതീക്ഷിക്കുന്നു.
