തമിഴ്നാട്ടിൽ പുതിയ ഭരണത്തിന് തുടക്കം കുറിച്ച് മുഖ്യമന്ത്രി ജോസഫ് വിജയ് നടത്തിയ ആദ്യ പ്രധാന തീരുമാനമായി സംസ്ഥാനത്തുടനീളം 717 മദ്യശാലകൾ അടച്ചുപൂട്ടാൻ ഉത്തരവിട്ടിരുന്നു . വിദ്യാഭ്യാസ സ്ഥാപനങ്ങൾ, ക്ഷേത്രങ്ങൾ, ബസ് സ്റ്റാൻഡുകൾ എന്നിവയ്ക്ക് സമീപം പ്രവർത്തിച്ചിരുന്ന കടകളാണ് ഈ നടപടിയിൽ ഉൾപ്പെട്ടത്.
പൊതുജനങ്ങളുടെ ദീർഘകാല ആവശ്യം പരിഗണിച്ചാണ് നടപടി സ്വീകരിച്ചതെന്ന് സർക്കാർ വൃത്തങ്ങൾ വ്യക്തമാക്കി. സമൂഹത്തിൽ മദ്യലഭ്യത നിയന്ത്രിക്കാനും സെൻസിറ്റീവ് പ്രദേശങ്ങളിൽ നിയന്ത്രണം ശക്തമാക്കാനും ലക്ഷ്യമിട്ടുള്ളതാണ് ഈ തീരുമാനം.
ഈ നീക്കത്തിന് അഭിനന്ദനം അറിയിച്ച് നടനും രാഷ്ട്രീയ നേതാവുമായ കമൽ ഹാസൻ രംഗത്തെത്തി. എക്സ് (X) പ്ലാറ്റ്ഫോമിലൂടെ പ്രതികരിച്ച അദ്ദേഹം, തമിഴ് കുടുംബങ്ങളുടെ അഭിലാഷങ്ങളെ മാനിച്ച് മുഖ്യമന്ത്രി വിജയ് സ്വീകരിച്ച നടപടി പ്രശംസനീയമാണെന്ന് പറഞ്ഞു.
മദ്യവിൽപ്പന സർക്കാരിന്റെ മുഖ്യ ലക്ഷ്യം ആയിരിക്കരുതെന്നും, മറിച്ച് അതിന്റെ നിയന്ത്രണത്തിൽ കൂടുതൽ ശ്രദ്ധ വേണമെന്നും കമൽഹാസൻ അഭിപ്രായപ്പെട്ടു. നിലവിലെ 717 കടകൾ അടച്ചുപൂട്ടുന്നത് നല്ല തുടക്കമാണെന്നും ഭാവിയിൽ ഈ നിയന്ത്രണം കൂടുതൽ ശക്തമാക്കണമെന്നും അദ്ദേഹം നിർദ്ദേശിച്ചു.
പുതിയ തീരുമാനത്തോടെ വിജയ് സർക്കാർ ഭരണരംഗത്ത് വ്യക്തമായ ദിശാബോധം നൽകുന്നുവെന്നാണ് രാഷ്ട്രീയ നിരീക്ഷകരുടെ വിലയിരുത്തൽ.
